ԼՂՀ պաշտպանության բանակի հյուսիս-արեւելյան ուղղությամբ տեղակայված զորամասերից մեկում նախորդ օրը՝ մարտի 22-ին, հանկարծամահ եղած Հայկ Մարգարյանը Երեւանի բնակիչ էր, Ֆիզիկական կուլտուրայի հայկական պետական ինստիտուտի շրջանավարտ: Հարեւանները NEWS.am-ին պատմեցին, որ Հայկը լողորդ է եղել, երբեք առողջական խնդիրներ չի ունեցել:
«Խելոք, համեստ, լսող երեխա էր: Մի օր տեղաշոր չի պառկել, որ ասեն՝ վայ, հիվանդ էր: Մի օր չի հիվանդացել: Ընտանիքի անդամներն էլ հաճախ էին գնում տեսակցության, խոսում հետը, ոչ մի բողոք չի ունեցել»,- ասաց հարեւանուհիներից Լարիսա Պարոնյանը:
Հարեւանները պատմեցին, որ Հայկը մահվան օրը՝ առավոտյան է խոսել մոր հետ, ոչ մի բողոք չի ունեցել:
ՀՀ ՊՆ Երեւանի Մաշտոցի վարչական շրջանի զինվորական կոմիսարիատից NEWS.am-ին ասացին, որ բանակ զորակոչվելիս Հայկի մոտ առողջական ոչ մի խնդիր չի եղել, պոլիկլինիկական հետազոտությունները ոչինչ ցույց չեն տվել:
Հայկ Մարգարյանը կրտսեր եղբայր ունի, որն աշնանն էր վերադարձել զինվորական ծառայությունից: Հայկը զորացրվելու էր մայիսին։
Նշենք, որ մեր տեղեկություններով՝ դեպքը եղել է րոպեների ընթացքում, զինծառայողն ասել է՝ վատ եմ, ջուր տվեք, եւ ուշաթափվել է: Նա մահացել է հոսպիտալի ճանապարհին:
Ավելի վաղ NEWS.am-ը հայտնել էր, որ մարտի 22-ին ՊԲ հյուսիս-արեւելյան ուղղությամբ տեղակայված զորամասերից մեկում՝ ժամը 17:15-ի սահմանում, հանկարծամահ է եղել ՊԲ զինծառայող Հայկ Տարոնի Մարգարյանը (ծնվ. 1992 թ.): Զինծառայողի մահվան հանգամանքներն ու պատճառները պարզելու համար զինվորական քննչական գլխավոր վարչությունում քննություն է իրականացվում, նշանակվել է դատաբժշկական փորձաքննություն:
ԼՂՀ պաշտպանության նախարարությունը կիսում է կորստյան վիշտը եւ իր զորակցությունը հայտնում մահացած զինծառայողի ընտանիքի անդամներին. հարազատներին եւ ծառայակիցներին:
