Քանի որ Եվրասիական տնտեսական միության տարածքում շատ այլ գործընթացներ առաջ են անցնում տնտեսական բնույթից, Ռուսաստանը գումարներ պետք է վճարի եվրասիական ինտեգրման համար։ Այս մասին մարտի 23-ին «ԵՏՄ տարածքում միասնական արժույթի անցնելու հնարավորություններն ու խնդիրները» թեմայով Երեւան-Մոսկվա հեռուստակամուրջի ժամանակ հայտարարեց ռուս տնտեսագետ Ալեքսանդր Կնոբելը։
ԵՏՄ տարածքում արժութային միություն ստեղծելու հարցի քննարկման մեկնարկի դրդապատճառների կապակցությամբ տնտեսագետը նշեց, որ դրա դրդապատճառները քաղաքական են, եւ դրանց մասին կարելի էր գլխի ընկնել։ «Կարծում եմ, որ Ռուսաստանը ցանկանում է ապահովել ինտեգրման ավելի խորը մակարդակ, բայց, ցավոք սրտի, մենք կոչվում ենք տնտեսական միություն, սակայն այնտեղ տնտեսական միություն չկա։ Որքան շատ քաղաքական ինտեգրումը առաջ անցնի ԵՏՄ տրամաբանական տնտեսական գործընթացներից, այնքան շատ այնտեղ իշխող կլինեն ոչ թե տնտեսական, այլ քաղաքական դրդապատճառները, եւ համապատասխանաբար այնքան շատ մասնակիցները պետք է վճարեն մյուսի ինտեգրման համար»,- նշեց Կնոբելը։