Հակառակորդի հատուկ նշանակության ջոկատի ուժեղացված խմբի՝ մարտի 19-ին ձեռնարկած հարձակման հետեւանքով վիրավորված, սպա Սարգիս Գաբրիելյանին մարտի 26-ին կտեղափոխեն հիվանդասենյակ: Այս մասին NEWS.am-ին ասաց Հայաստանի կենտրոնական զինվորական կլինիկական հոսպիտալի պետ Արամ Ասատուրյանը:
«Երկու զինծառայողների վիճակն էլ լավ է, ապաքինվում են: Սարգիսին արդեն հիվանդասենյակ կտեղափոխենք»,- ասաց Արամ Ասատուրյանը:
Նշենք, որ Երեւան տեղափոխված զինծառայողներից Էդգար Մարտիրոսյանը որովայնի թափանցիկ հրազենային վիրավորում ունի հաստ եւ բարակ աղիների վնասումով, իսկ սպա Սարգիս Գաբրիելյանն ունի աջ վերին վերջույթի վերին երրորդական մակարդակում տրավմատիկ ամպուտացիա եւ բազմաթիվ բեկորային վիրավորումներ:
Ինչ վերաբերվում է Ստեփանակերտի զինվորական հոսպիտալում բուժում ստացող զինծառայողներին, ապա Արամ Ասատուրյանի խոսքով՝ նրանց վիճակը շարունակում է ծայրահեղ ծանր մնալ: Նշենք, որ Սամվել Հակոբյանը վիրավորվել է գլխի շրջանում, իսկ Գոռ Դարմանյանի մոտ առկա է ազդրի ամպուտացիա:
Հիշեցնենք, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում: Հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են:
