«Նաիրիտ» ՓԲԸ աշխատակիցները նամակով կդիմեն ՀՀ գլխավոր դատախազ Գեւորգ Կոստանյանին՝ պահանջելով բացահայտել Կառավարության անմիջական մասնակցությամբ մի շարք պաշտոնական չարաշահումները, որոնց պատճառով գործարանն այժմ 15մլն. աշխատավարձային պարտք ունի: Այս մասին այսօր՝ մարտի 24-ին, NEWS.am-ի հետ զրույցում ասաց գործարանի նախկին մամուլի քարտուղար Անուշ Հարությունյանը:
«Նաիրիտցիներն անհանգիստ են, որ գործարան մեծ գումարներ են եկել 2006թ. ից, եւ չգիտես՝ ինչու 15 միլիոնը գործարանի եւ այս պետության համար մեծ խնդիր է դարձել: Դրա համար որոշել ենք դիմել դատախազություն, որպեսզի դատախազությունը փորձի այդ ամենի մեջ հստակություն մտցնել եւ պարզել, թե ինչ են եղել այդ գումարները: Պահանջում ենք, որ նաեւ պարզեն, որ այդ ամեն ինչում իր անմիջական մասնակցությունն ունեցել կառավարության ներկայացուցիչը. ինչ գործընթաց էլ որ տեղի է ունեցել, կառավարությունը դրանից տեղյակ է եղել: Հիմա կառավարությունից պահանջում ենք մեր գումարները, դատախազությանն էլ կոչ ենք անում ստուգել եւ հետեւել այդ ամեն ինչին»,-ասաց Անուշ Հարությունյանը:
Հիշեցնենք, որ հարկադիր պարապուրդի մատնված՝ «Նաիրիտ» գործարանի աշխատակիցների՝ 18-24 ամսվա աշխատավարձերի պարտքը կազմում է մոտ 15 մլն դոլար: Նրանք բազմիցս հավաքվել են Կառավարության եւ նախագահականի մոտ՝ պահանջելով իրենց խնդիրների լուծում: