Պետք չէ մտածել, թե Ղազախստանը՝ որպես թյուրքալեզու երկիր, չի ցանկանում Հայաստանին տեսնել Եվրասիական տնտեսական միությունում։ NEWS.am-ի թղթակցի հետ զրույցում նման կարծիք է հայտնել Ղազախստանի խորհրդարանի Սենատի պատգամավոր Ռաշիդ Աքիմովը։
«Բացարձակ նման բան չկա։ Լինելով նաեւ Ղազախստանի խորհրդարանի ներկայացուցիչ՝ ես չեմ կարող դա հաստատել։ Մեր պետությունը երկկողմ ձեւաչափով համագործակցում է Հայաստանի հետ, իսկ այժմ այդ համագործակցությունը կտեղափոխվի Եվրասիական միության ձեւաչափ»,- հայտարարել է Աքիմովը։
Պատգամավորը նշել է, որ Ղազախստանը միշտ կողմ է եղել առողջ ինտեգրացիոն գործընթացներին եւ հիշեցրել, որ Եվրասիական համագործակցության գաղափարը պատկանում էր Ղազախստանի նախագահ Նուրսուլթան Նազարբաեւին։ «Միգուցե կան տեխնիկական բնույթի հարցեր։ Դա մեկ օրվա հարց չէ, սակայն դա Ղազախստանի համար բացարձակապես առիթ չէ՝ խոչընդոտելու որեւէ երկրի անդամակցությանը։ ՀՀ կառավարության ցանկության դեպքում համապատասխան լուծումներ կգտնվեն։ ԵՏՄ-ն նոր շուկաներ հնարավորություն է բացում։ Դեռեւս նախքան պատժամիջոցները Ղազախստանը խնդիր էր դրել 60 հազար տոննա տավարի միս արտահանել, իսկ ցորենի արտահանման ծավալներով մենք ավանդաբար աշխարհի խոշորագույն արտահանողներից մեկն ենք»,- եզրափակեց ղազախ պատգամավորը։