Թուրքիայի խորհրդարանի նախագահ, հայատյաց հայտարարություններով հայտնի Ջեմիլ Չիչեքը ԱՄՆ-ում հայտարարել է, թե 1915-ի վերաբերյալ իրականության բացահայտման ամենաշահագրգիռ կողմը Թուրքիան է։
Ինչպես տեղեկացնում է «Ամերիկայի ձայնի» թուրքական ծառայությունը, ԱՄՆ կատարած այցի ժամանակ Թուրքիայի խորհրդարանի նախագահ Ջեմիլ Չիչեքն անդրադարձել է հայ-թուրքական հարաբերություններին։
Չիչեքը պնդել է, թե 1915-ի վերաբերյալ իրականության բացահայտման ամենաշահագրգիռ կողմը Թուրքիան է։ Չիչեքը բողոքել է, թե ապրիլի 24-ը մոտենալուն զուգահեռ Հայաստանը Թուրքիայի բարի կամքին դրական պատասխան տալու փոխարեն գերադասում է Թուրքիայի դեմ գործունեություն իրականացնել։
Ըստ Թուրքիայի խորհրդարանի խոսնակի՝ հայ-թուրքական հարաբերությունների կարգավորման համար դեռեւս հույսեր կան։ Նա որպես ապացույց բերել է Էրդողանի եւ Դավութօղլուի ուղերձները։