Սոցիալ Դեմոկրատ Հնչակյան կուսակցությունը (ՍԴՀԿ) դեմ է, որ Հայաստանի սփյուռքի նախարարի աթոռը զբաղեցնի ՀՅԴ-ն:
Այս մասին հաղորդագրություն է տարածել ՍԴՀԿ կենտրոնական վարչությունը:
Հաղորդագրությունում ասվում է.
«Տարբեր լրատվամիջոցներից վերջին օրերի ընթացքում դիմեցին Սոցիալ Դեմոկրատ Հնչակյան կուսակցությանը կարծիք հայտնելու մամուլում շրջանառվող լուրերին, թե ապրիլի 24-ից հետո ՀՅԴ մաս է կազմելու կուալիցիոն կառավարության եւ ստանձնելու է մի քանի նախարարություններ, այդ թվում նաեւ Սփյուռքի նախարարությունը:
Ի պատասխան հարցերի՝ ՍԴՀԿ ԿՎ անդամ Գեւորգ Պերկուպերկյանը հայտնեց, թե ինչ որոշում կկայացնի ՀՅԴ մաս կազմել կուալիցիային կամ ոչ, դա իր անելիքն է: Անրադառնալով Սփյուռքի նախարարությանը, մեզ համար անընդունելի է, որ Սփյուռքի նախարարի աթոռը զբաղեցնի ՀՅԴ:
Նկատի ունենալով, որ Սփյուռքը բազմաշերտ է, հետեւաբար պետք է հեռու պահել կուսակցական պիտակավորումից, որը վնաս կհասցնի Սփյուռք-Հայաստան կապերի ամրապնդմանը»: