Ադրբեջանի պաշտպանության նախարարությունը հայտարարություն է տարածել, որով փորձում է համոզել, որ օրերս գերեվարված ԼՂՀ քաղաքացի Անդրանիկ Գրիգորյանին ընդունելի պայմաններում են պահում։
Ինչպես գրում է ադրբեջանական haqqin.az պարբերականը, հայտարարության մեջ ասվում է, որ Անդրանիկ Գրիգորյանի անվտանգությանը ոչինչ չի սպառնում։ «Անդրանիկ Գրիգորյանը իր առողջական վիճակի եւ կալանքի պայմանների կապակցությամբ ոչ մի բողոք չունի։ Գրիգորյանը ապահով եւ մարդու իրավունքների չափանիշներին համապատասխանող պայմաններում է պահվում»,- ասված է հայտարարության մեջ։
Հիշեցնենք, որ մարտի 22-ին՝ ժամը 13:50-ի սահմաններում, ՊԲ արեւելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն է անցել ՊԲ զինծառայող, 1991թ. ծնված շարքային-պայմանագրային Անդրանիկ Արարատի Գրիգորյանը: Դեպքի առթիվ հարուցվել է քրեական գործ։