«Նուբարաշեն» ՔԿՀ-ի մոտ հնչած կրակոցների գործով 11 օր հետախուզման մեջ գտնված, ապա ոստիկանություն ներկայացած Ծգլ, Տլե եւ Գաստիկ մականուններով քրեական հեղինակությունները կալանավորում են: Խոսքը 29չ-ամյա Սարգիս Գրիգորյանի (մականունը՝ Ծգլ), 31-ամյա Սարգիս Հախանումյանի (մականունը՝ Տլե) եւ 31-ամյա Վահան Հակոբյանի (մականունը՝ Գաստիկ) մասին է:
Նախաքննություն իրականացնող ԱԱԾ-ն դիմել է Կենտրոն եւ Նորք Մարաշ դատարանին, որպեսզի վերահաստատի այդ անձանց նկատմամբ ընտրված խափանման միջոց կալանքը եւ մեղադրանքը:
Հիշեցնենք, որ մարտի 4-ին, ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, ճանապարհին նրանք մահացել են։ Նախնական տեղեկություններով՝ մի քանի հոգի կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:
Կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։
Դեպքի առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: Ոստիկանությունը մարտի 12-ին հետախուզում էր հայտարարել ՀՀ քրեական օրենսգրքի 104 եւ 235 հոդվածների հատկանիշներով մեղադրվող 1986 թ. ծնված Սարգիս Գրիգորյանի (մականունը՝ Ծգլ), 1984 թ. ծնված Սարգիս Հախանումյանի (մականունը՝ Տլե) եւ 1984 թ. ծնված Վահան Հակոբյանի (մականունը՝ Գաստիկ) նկատմամբ:
Եւս հինգ անձինք ավելի վաղ էին ձերբակալվել։