Տպավորություն է, որ Արտակ Շաբոյանի գործառույթը ոչ թե տնտեսական մրցակցությունը, այլ Սերժ Սարգսյանի սահմանած մոնոպոլիաները պաշտպանելու համար է: Այս մասին այսօր՝ մարտի 26-ին, ԱԺ նիստի ժամանակ ասաց ՀԱԿ խմբակցության պատգամավոր Նիկոլ Փաշինյանը՝ անդրադառնալով Տնտեսական մրցակցության պաշտպանության պետական հանձնաժողովի տարեկան ծրագրին:
«Երբ մարտի 25-ին ասացի, որ շաքարավազի գինը 395 դրամ է, Արտակ Շաբոյանը հակադարձեց, որ «Երեւան Սիթի»-ում հենց այսօր 360 դրամով է վաճառվում շաքարավազը: Պարոն Շաբոյան, լավ է չասացիք՝ ««Երեւան Սիթի», ամենացածր գները տարածաշրջանում պլյուս 3 հատ լավաշ: Հարգելի քաղաքացիներ, չմոռանաք ձեզ հետ բերել անձնագիր»: Տպավորություն է, որ Արտակ Շաբոյանի գործառույթը ոչ թե տնտեսական մրցակցությունը, այլ Սերժ Սարգսյանի սահմանած մոնոպոլիաները պաշտպանելու համար է»,- ասաց Նիկոլ Փաշինյանը:
Թե ինչու է «Երեւան Սիթի»-ում շաքարավազը վաճառվում 360 դրամով, ընդդիմադիր պատգամավորի համար պատասխանը պարզ է. Հայաստանում շաքարավազի մոնոպոլիան եւ «Երեւան Սիթի» խանութները ցանցը պատկանում է միեւնույն անձին՝ ՀՀԿ-ական պատգամավոր Սամվել Ալեքսանյանին, որն էլ շաքարավազը նույն գնով վաճառում է եւ սովորական գնորդներին, եւ փոքր եւ միջին ձեռնարկատերերին:
