Իրանը բոլոր ջանքերը կգործադրի Եմենում ծավալվող հակամարտությունը զսպելու համար։ Այս մասին «Ալ Արաբիա» հեռուստաալիքին տված հարցազրույցում հայտարարել է Իրանի Իսլամական Հանրապետության արտգործնախարար Մուհամմեդ Ջավադ Զարիֆը։
«Մենք բոլոր ջանքերը կգործադրենք, որպեսզի զսպենք Եմենում ծավալվող ներկա հակամարտությունը»,- հայտարարել է նախարարը, որն այս պահին Շվեյցարիայում Թեհրանի միջուկային ծրագրի շուրջ բանակցություններ է վարում ԱՄՆ պատվիրակության հետ, գրում է ՏԱՍՍ-ը։
Ավելի վաղ Իրանը Սաուդյան Արաբիայից պահանջել էր անմիջապես դադարեցնել միջամտել Եմենի ներքին գործերին։ «Իրանի Իսլամական Հանրապետությունը Սաուդյան Արաբիայից պահանջում է անմիջապես վերջ տալ Եմենի ներքին գործերին միջամտելուն։ Մենք պահանջում ենք վերջ տալ ագրեսիային։ Մարտական գործողությունները ոտնահարում են Եմենի ինքնիշխանության իրավունքը։ Ագրեսիան ոչ միայն չի կասեցնի, այլ նաեւ կնպաստի երկրում արյունահեղության ծավալմանը»,- հայտարարել է Զարիֆը լրագրողներին։