Մարսելի դատախազ Բրիս Ռոբենը հայտնել է Ֆրանսիայում կործանված Airbus А320 օդանավի երկրորդ օդաչուի անունը: Նա 28-ամյա Անդրեաս Լյուբիցն է, որը ոչ մի առնչություն չունի ահաբեկչության հետ, ասել է դատախազը:
Այսօր՝ մարտի 26-ին կայացած մամուլի ասուլիսի ժամանակ Մարսելի դատախազը մանրամասն կանգ է առել աղետի դետալների վրա: «Մենք լսել ենք, թե ինչպես է օդանավի հրամանատարը երկրորդ օդաչուին խնդրել իր վրա վերցնել օդանավի կառավարումը: Մենք լսել ենք դռան փակվելու եւ բազկաթոռի տեղաշարժվելու ձայնը»,-ասել Ռոբենը:
Մինչ երկրորդ օդաչուն մենակ է եղել օդաչուների խցում, օդանավն սկսել է իջնել: «Առավել հավանական բացատրությունն այն է, որ օդաչուն դիտմամբ հրաժարվել է բացել խցի դուռը եւ ներս թողնել հրամանատարին: Նա սեղմել է կոճակը, որպեսզի օդանավը սկսի իջնել: Մենք չգիտենք, թե ինչու է նա այդպես վարվել, բայց, երեւում է, նա ցանկացել է ոչնչացնել օդանավը»,-ամփոփել է Ռոբենը: