«Տլեն» եւ «Գաստիկը» եւս կալանավորվեցին. փաստաբանն ապօրինի է համարում որոշումը

Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում քիչ առաջ ավարտվեց «Նուբարաշեն» ՔԿՀ-ի մոտ մարտի 4-ին եռակի սպանության գործով ձերբակալված «Ծգլի», «Տլեի» եւ «Գաստիկի» խափանման միջոցներն ընտրելու վերաբերյալ դռնփակ դատական նիստը:

NEWS.am-ի թղթակիցը դատարանից հաղորդում է, որ երեք ձերբակալվածներն էլ կալանավորվեցին:

Նրանց փաստաբան Լուսինե Սահակյանը նիստից հետո լրագրողների հետ զրույցում դատարանի որոշումն ապօրինի որակեց:

«Երեք որոշումներն էլ ակնհայտ ապօրինի են այն պատճառով, որ հիմնազուրկ են եւ բացակայում է հիմնավոր կասկածը: Չպատճառաբանվեցին, թե ինչու անթույլատրելի ճանաչվեց գրավի կիրառումը՝ որպես այլընտրանքային խափանման միջոց: Առաջադրված մեղադրանքում հիմնավոր կասկածը բացակայում էր ընդհանրապես: Քննիչը չկարողացավ ներկայացնել ապացույցներ, որոնցով կհամոզեր պաշտպանական կողմին, որ առկա է հիմնավոր կասկածը»,- ասաց փաստաբանը՝ նշելով, որ առաջին ատյանի որոշումը պատրաստվում են բողոքարկել Վերաքննիչ դատարանում:

Հիշեցնենք, որ նրանք 11 օր հետախուզման մեջ գտնվելուց հետո ինքնակամ ներկայացել էին Ազգային անվտանգության ծառայություն:

Հիշեցնենք, որ մարտի 4-ին, ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, ճանապարհին նրանք մահացել են։ Նախնական տեղեկություններով՝ մի քանի հոգի կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:

Կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։

Դեպքի առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: Ոստիկանությունը մարտի 12-ին հետախուզում էր հայտարարել ՀՀ քրեական օրենսգրքի 104 եւ 235 հոդվածների հատկանիշներով մեղադրվող 1986 թ. ծնված Սարգիս Գրիգորյանի (մականունը՝ Ծգլ), 1984 թ. ծնված Սարգիս Հախանումյանի (մականունը՝ Տլե) եւ 1984 թ. ծնված Վահան Հակոբյանի (մականունը՝ Գաստիկ) նկատմամբ:

Եվս 5 անձինք ավելի վաղ էին ձերբակալվել։