Կալիֆորնիայի Գլենդել քաղաքի Վահան եւ Անուշ Շամլյանների անվան հայկական դպրոցի առաջին եւ ութերորդ դասարանների աշակերտները, ի նշանավորումն Հայոց ցեղասպանության 100-րդ տարելիցի, Լա Կրեսենտե ուսանողական ավանի այգում 100 անմոռուկ են տնկել: Այս մասին գրում է տեղական «Glendale News-Press» պարբերականը:
Աշակերտական խորհրդի համանախագահ, 13-ամյա Արա Յակուբյանը նշել է, որ ութերորդ դասարանցիները ցանկանում էին փոքրիկներին ներգրավել ծաղիկները տնկելու գործում, որպեսզի նրանք կարողանան խնամել բույսերը: Ութերորդ դասարանցիները նաեւ պատրաստվում են հաջորդ շաբաթ Հայաստան ժամանել:
Դպրոցի տնօրեն Թալին Քարկոտորյանը նույնպես մասնակցել է ծաղիկները տնկելուն: «Ցանկանում ենք աշակերտներին հնարավորություն ընձեռել հարգել իրենց անցյալը եւ, միաժամանակ, նրանց համայնքի պատասխանատու եւ ակտիվ անդամ դարձնել»,- ասել է նա:
Այս միջոցառումից բացի, Շամլյանների անվան դպրոցի աշակերտների հայրերը հայտարարել են Լոս Անջելեսից դեպի Վաշինգտոն (ավելի քան 4.800 կմ) քայլերթ կամ հեծանվավազք նախաձեռնելու մասին: Նրանք մարաթոնը սկսելու են ապրիլի 24-ին, Լոս Անջելեսից, իսկ ԱՄՆ մայրաքաղաքում կլինեն մայիսի 7-ին: Ճանապարհին նրանք ձգտելու են բարձրացնել Հայերի եւ այլ ժողովուրդների ցեղասպանության մասին մարդկանց տեղեկացվածությունը:
