Գիտնականները հայտարարել են, որ ացտեկների ժամանակաշրջանի մեզոամերիկյան պետական կազմավորումները միմյանց միջեւ բարդ աշխարհաքաղաքական հարաբերություններ են կառուցել, որոնք վերաբերել են ոչ միայն պատերազմին եւ խաղաղությանը:
Հնագետները պեղումներ են անցկացրել այն վայրում, որտեղ XIII-XVI դարերում տեղակայված է եղել Թլասկալա քաղաք-պետությունը: XVI դարի սկզբին քաղաքը շրջապատված է եղել Ացտեկյան կայսրության տարածքներով, որի հետ քաղաքը բավական լարված հարաբերություններ է ունեցել:
Չնայած դրան՝ Թլասկալայի բնակիչները զենք, զարդեր եւ կուռքային իրեր պատրաստելիս օբսիդիան են օգտագործել: Սակայն քաղաք-պետության տարածքում դրա աղբյուրներ չեն եղել:
Ըստ Gazeta-ի, Ացտեկյան կայսրությանը մատակարարվող օբսիդիանի ավելի քան 90%-ը բերվել է Պաչուկա քաղաքից, իսկ Թլասկալայի բնակիչներն այն ներմուծել են բոլորովին այլ վայրից՝ Էլ Պարեդոն քաղաքից:
Հնագետները վստահ են. այս փաստերը վկայում են այն մասին, որ ացտեկները կարողացել են իրենց հարեւանների հետ բավական բարդ աշխարհաքաղաքական հարաբերություններ հաստատել: Չնայած Թլասկալան կայսրության թշնամին է եղել, սակայն ացտեկները չեն ձգտել արգելափակել օբսիդիանի ներմուծումը քաղաք, որն այստեղ օգտագործվել է նաեւ զենքի արտադրության մեջ: