Նախկին վարչապետներ Հրանտ Բագրատյանը, Վազգեն Մանուկյանը եւ Խոսրով Հարությունյանը չեն ցանկանում հրապարակել այսօր՝ մարտի 26-ին, վարչապետների ակումբի քննարկման մանրամասները:
Հանդիպումից հետո լրագրողները ՀԱԿ խմբակցության պատգամավոր Հրանտ Բագրատյանից հետաքրքրվեցին, թե որն է այս ակումբի նպատակը եւ հանդիպումն որքանով էր արդյունավետ:
«Ստրատեգիական հանդիպում է, տնտեսական խնդիրներն են լուծվում, փորձում ենք գտնել եւ լուծել պրոբլեմը, որ տնտեսությունը չպայթի: Արդյունավետության խնդիր էլ չկա, ոնց որ գնաս, տունդ ընթրիք անես, ասեն՝ ընթրիքդ արդյունավետ է, թե ոչ: Մենք, իհարկե, ընթրիք չենք արել, միայն թեյ ենք խմել: Ես միշտ ասել եմ՝ լավ բան է, հավաքվենք, խոսենք: Ահագին բան փոխանցվեց, խոսակցության ընթացքում զուլալվում է, թե որտեղ է պրոբլեմը: Սրանից ավելին չեմ ասի»:
Խոսրով Հարությունյանն էլ հայտարարեց, որ իրենք պայմանավորվել են հանդիպման մանրամասներ չհայտնել: Վազգեն Մանուկյանը նույնպես հրաժարվեց քննարկման բուն բովանդակությունը հրապարակել:
Նշենք, որ ըստ կառավարության տարածած հաղորդագրության՝ վարչապետ Հովիկ Աբրահամյանի նախաձեռնությամբ տեղի է ունեցել վարչապետների ակումբի անդրանիկ նիստը, որին մասնակցել են Հովիկ Աբրահամյանը, Վազգեն Մանուկյանը, Գագիկ Հարությունյանը, Խոսրով Հարությունյանը եւ Հրանտ Բագրատյանը:
Քննարկվել են ակումբի հետագա գործունեությանը եւ տնտեսությանն առնչվող հարցեր: