Վարդենիսի զինվորական հոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ 2014թ.-ի հունվարի 13-ին տեղափոխված ժամկետային զինծառայող, նորակոչիկ Մհեր Խլղաթյանի գործով դատական նիստը հերթական անգամ հետաձգվել է: Այս մասին NEWS.am-ին ասաց գործով կալանավորված բուժծառայության պետ, կապիտան Արման Թադեւոսյանի փաստաբան Լիպարիտ Սիմոնյանը:

Նա հայտնեց, որ նիստը հետաձգվել է Մհեր Խլղաթյանի չներկայանալու պատճառով:

«Դատավորը խոստացավ, որ սա վերջին անգամն է լինելու: Ապրիլի 1-ին կայանալիք նիստում ես միջնորդելու եմ, որ ապացույցների շարքից հանվեն Մհեր Խլղաթյանի, նրա մոր՝ Գոհար Շահնազարյանի եւ հորեղբոր որդու՝ Նվեր Խլղաթյանի ցուցմունքները: Այլ տարբերակ չէ, արդեն վեց ամիս դատարանը նրանց բերման է ենթարկում, սակայն չի ստացվում, նրանք չեն ներկայանում»,- ասաց փաստաբանը:

Նա ընդգծեց, որ անկախ ցուցմունքներից՝ իր պաշտպանյալին առաջադրված մեղադրանքը հաստատված չէ:

Հիշեցնենք, որ 2014թ. հունվարի 13-ին, ժամը 02-10-ի  սահմաններում  ՀՀ ՊՆ Վարդենիսի զինհոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ էր տեղափոխվել N զորամասի ժամկետային զինծառայող, նորակոչիկ Մհեր Արմենի Խլղաթյանը:

Գործի շրջանակներում բուժծառայության պետ, կապիտան Արման Դավիթի Թադեւոսյանը կալանավորվել էր հունվարի 17-ին, նրան մեղադրանք էր առաջադրվել Քրեական օրենսգրքի 358.1 հոդվածի 3-րդ մասի 1-ին մասի (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը): Զորամասի ժամկետային զինծառայող, կրտսեր սերժանտ Վահե Արմենի Օհանյանը եւ դասակի հրամանատար, ավագ լեյտենանտ Հրաչ Սամվելի Մնացականյանը կալանավորվել էին հունվարի 18-ին, նրանց մեղադրանք էր առաջադրվել 358.1 հոդվածի 3-րդ մասի 1-ին կետի (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը) եւ 358.1 հոդ. 2-րդ (զինվորական ծառայության պարտականությունները կատարելու կապակցությամբ ստորադասի նկատմամբ բռնություն գործադրելը) մասերով: