Եթե «Ժառանգության» անդամներ Արմեն Մարտիրոսյանն ու Ռուբեն Հակոբյանը հանդիպել են ՀՀ նախագահի հետ, դա չի նշանակում, որ կուսակցությունը ճանաչում է իշխանությունների լեգիտիմությունը: Այս մասին, այսօր՝ մարտի 27-ին, ԱԺ-ում ճեպազրույցների ժամանակ հայտարարել է «Ժառանգություն» խմբակցության քարտուղար Թեւան Պողոսյանը:
Նա չի համաձայնել նույն խմբակցության պատգամավոր Զարուհի Փոստանջյանի հետ, ով Մարտիրոսյանի ու Հակոբյանի այցի մասին նշել էր, թե «գուցե գնացել են որպես Բաղրամյան 26-ի հաճախորդներ»:
«Եթե «Ժառանգությունն» ունի իր տեսակետը, այն պետք է պահել եւ ներկայացնել: Ոչ թե առաջարկել ու հետո բողոքել, որ քեզ չլսեցին, ի՞նչ իմաստ կա դրանում: Հետեւաբար գործընկերների որոշումը պետք է հարգել»,-ասել է Պողոսյանը:
Այլ բան է, որ չի կարելի մասնակցել իմիտացիոն գործընթացի, որի մասին ավելի վաղ խոսել է կուսակցության առաջնորդ Րաֆֆի Հովհաննիսյանը: «Եկեք ավելի լավ է կենտրոնանանք արդյունքի վրա: Եթե իշխանությունը համաձայն է քննարկելի առաջարկները՝ դա մի բան է, իսկ եթե ասում է, որ քննարկելու բան չկա, դա բոլորովին այլ բան է: Եկեք մտածենք այդ հարթությունում»,-հայտարարել է պատգամավորը:
Հարցին, թե արդյոք «Ժառանգությունը» կամա-ակամա չի ճանաչում գործող իշխանության լեգիտիմությունը՝ համաձայնելով նրա հետ հարցեր քննարկելի, Պողոսյանը բացասական պատասխան է տվել. «Եթե ահաբեկիչները շենք են գրավում, իսկ դուք այն ազատում եք, դուք հո չե՞ք ասելու՝ ահաբեկիչները լեգիտիմ չեն, ես հրաժարվում եմ նրանց հետ խոսել»: