Ավստրալիայի հայերն ու հույները բողոքում են Սիդնեյի Հայդ պարկում Աթաթուրքի հուշարձանի կառուցման դեմ։ Ինչպես գրում է Greek Reporter-ը, մի քանի հունական, պոնտական եւ հայկական կազմակերպություններ իրենց դժգոհությունն են հայտնել հուշարձանի տեղադրման կապակցությամբ՝ նամակով դիմելով Սիդնեյի պաշտոնյաներին եւ տեղեկատվական գործակալություններին։
«Քեմալ Աթաթուրքը պատասխանատու է Թուրքիայում բնակվող ազգային փոքրամասնությունների բռնի մահվան երթերի եւ իր իշխանության դեմ դուրս եկող Թուրքիայի քաղաքացիների զանգվածային սպանությունների համար։ Մուստաֆա Քեմալ Աթաթուրքը եւ նրա համախոհները, որոնք հայտնի են իբրեւ քեմալականներ, բարբարոսական բռնություններ են գործադրել Թուրքիայում ապրող փոքրամասնությունների նկատմամբ»,- նշել է Ավստրալիայի հայ երիտասարդության դաշնությունը Ավստրալիայի Նոր Հարավային Ուելս նահանգի խորհրդարանի անդամ Վիկտոր Դոմինելին հղած բողոքի նամակում։ Դաշնությունը կոչ է արել կողմնակիցներին հուշարձանի ապամոնտաժման միջնորդագիր ստորագրել։
Նշենք, որ Աթաթուրքի հուշարձանի բացման արարողությունը տեղի էր ունեցել փետրվարի 19-ին Գալիպոլիի ճակատամարտի 100-ամյակին նվիրված միջոցառումների շրջանակներում։
Բողոքի նամակը ստորագրել են նաեւ հունական սփյուռքի ներկայացուցիչները։ Ավստրալիայի հայ դատի հանձնախումբը հայտարարել է. «2015թ. նշանավորվում է ոչ միայն Ավստրալանորզելանդական բանակային կորպուսի զինվորների հիշատակի հարյուրամյակով, այլ նաեւ Հայոց ցեղասպանության 100-ամյա տարելիցով։ Շատ կարեւոր է, որպեսզի նորագույն պատմության նման կարեւոր ժամանակաշրջանում փաստերը ճիշտ ներկայացվեն»։