Հակառակորդի հատուկ նշանակության ուժեղացված խմբին դիմակայելու ժամանակ մարտի 19-ին ծանր վիրավորված եւ նախորդ օրը հոսպիտալում մահացած ՊԲ զինծառայող, 19-ամյա Սամվել Հակոբյանին զինվորական կարգով կհուղարկավորեն վաղը` մարտի 28-ին: Այս մասին NEWS.am-ին ասաց Արեւաբույրի գյուղապետ Մարտին Ավետիսյանը:
Սամվել Հակոբյանին հողին կհանձնեն հայրենի Արեւաբույր համայնքի գերեմանատանը: Զինծառայողի հոգեհանգստյան արարողությունը տեղի կունենա այսօր նրա հայրական տանը:
Նշենք, որ Սամվել Հակոբյանը վիրավորվել էր գլխի շրջանում։ Նրա վիճակը ծայրահեղ ծանր էր, նա անգիտակից վիճակում էր:
Հիշեցնենք, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում:
Ցավոք, հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են: