Թուրքիայի նախագահ Ռեջեփ Թայիթ Էրդողանը եւ Սաուդյան Արաբիայի թագավոր Սալման իբն Աբդուլ Ազիզ Ալ Սաուդը մարտի 27-ին կայացած հեռախոսազրույցում կարծիքներ են փոխանակել Եմենում ռազմական գործողությունների վերաբերյալ։ Այս մասն հայտնում է NTV հեռուստաընկերությունը։
Համաձայն հեռուստաընկերության՝ նախագահի աշխատակազմում ունեցած աղբյուրների, երկու երկրների առաջնորդները համաձայնության են եկել, որ ապստամբ հուսիները իրենց գործողություններով խախտել են նախօրոք ձեռք բերված պայմանավորվածությունը եւ հող են ստեղծել Եմենում հակամարտության սրման համար, գրում է «ՌԻԱ Նովոստի»-ն։
Ավելի վաղ Էրդողանը հայտարարել է Թուրքիայի կողմից Եմենում գործողությունների լոգիստիկ աջակցության մասին։
Նշենք, որ Եմենում միջազգային ռազմական գործողություններ են ընթանում, որոնցում մասնակցում են տարածաշրջանի մի շարք երկրներ։ Սաուդյան Արաբիայի, Քուվեյթի, Բահրեյնի, ԱՄԷ, Քաթարի ղեկավարները մտադիր են արձագանքել Եմենի նախագահ Աբդ Ռաբու Մանսուր Հադիի խնդրանքին՝ պաշտպանել Եմենի իշխանությունը հուսի գրոհայիններից։ Պաշտոնապես գործողություններին միացել են Եգիպտոսը, Հորդանանը եւ Սուդանը։
