Երկրի բնակիչները 2015 թվականին կկարողանան երկու անգամ լուսնի խավարման ականատես լինել: Արեւմտյան կիսագնդի բնակչությունն այն կտեսնի ապրիլի 4-ին, Արեւելյան կիսագնդինը՝ սեպտեմբերի 28-ին, արեւածագից առաջ: Այս մասին ՏԱՍՍ գործակալությանը հաղորդել են Ռուսաստանի ազգային ակադեմիայի կիրառական աստղագիտության ինստիտուտում:
«Ապրիլի 4-ին լուսնի խավարման ականատես կարելի է լինել Հյուսիսային եւ Հարավային Ամերիկաներում եւ Խաղաղ օվկիանոսի կղզիներում, Ավստրալիայում եւ Նոր Զելանդիայում: Լուսինը Երկրի ստվերի մեջ կընկղմվի եւ 8 րոպե շարունակ արնակարմիր երանգ կունենա: Սեպտեմբերի 28-ի լիարժեք խավարումն ավելի երկարատեւ կլինի՝ 1 ժամ 13 րոպե: Այն տեսանելի կլինի Եվրոպայում, Ասիայի արեւմուտքում, Աֆրիկայում, Գրենլանդիայում, Հյուսիսային եւ Հարավային Ամերիկաներում»,- նշել է ինստիտուտի մամուլի քարտուղար Նիկոլայ Ժելեզնյովը:
Լուսինը Երկրի ստվերում կլինի այդ պահից առաջ եւ հետո 4-ական րոպե:
2015 թվականին լուսնի խավարումներին ուղեկցում են արեւի խավարումները: Մարտի 20-ին արեւի խավարում տեղի ունեցավ, երկրորդը կլինի սեպտեմբերի 13-ին, իսկ լուսնի խավարում կգրանցվի յուրաքանչյուրից երկու շաբաթ անց: