ՆԱՏՕ-ն չի ձգտում շարժվել դեպի Արեւելք, այլ Արեւելյան Եվրոպայի երկրներն են ուզում դառնալ Դաշինքի եւ ԵՄ-ի անդամ: Այս մասին հայտարարել է ՆԱՏՕ-ի գլխավոր քարտուղար Յենս Սթոլթենբերգը՝ կանադական Maclean's ամսագիրն տված հարցազրույցում:
«Անկախ պետությունները թակել են ՆԱՏՕ-ի դուռը եւ ցանկացել կազմակերպության անդամ դառնալ: ՆԱՏՕ-ն որեւէ կերպ չի շարժվում դեպի արեւելք, այլ արեւելքն է ուզում միանալ ՆԱՏՕ-ին եւ ԵՄ-ին»,-ասել է նա:
ՆԱՏՕ-ի գլխավոր քարտուղարի խոսքով՝ որեւէ մեկին չեն ստիպել ու չեն ստիպում Դաշինքի անդամ դառնալ:
Ուկրաինայի եւ Վրաստանի ՆԱՏՕ-ի անդամ դառնալու վերաբերյալ Սթոլթենբերգը հայտարարել է, որ «Դաշինքում առաջվա պես գործում է բաց դռների քաղաքականությունը»:
«Եթե խոսենք Վրաստանի մասին, մեքն շատ սերտորեն համագործակցում ենք այդ երկրի հետ: Մենք ուսումնական կենտրոն ենք ստեղծում եւ աշխատում ենք Վրաստանի հետ, որպեսզի նա կարողանա առաջ ընթանալ դեպի անդամակցություն: Ուկրաինայի մասին. մի քանի տարի առաջ նրանդ դիմեցին ՆԱՏՕ-ին անդամագրվելու համար, բայց հետո որոշեցին ընտրել որեւէ բլոկում չլինելու կարգավիճակը: Ես հարգում էի այդ որոշումը: Հիմա ուկրաինացիները վերափոխումների գործընթաց են սկսել՝ նպատակ ունենալով նորից անդամության հայտ ներկայացնել: Երբ նրանք պատրաստ լինեն, մենք կքննարկենք այդ հայտը»,-ասել է Սթոլթենբերգը: