Ֆրանսիայի հարավում Germanwings ավիաընկերությանը պատկանող կործանված օդանավի երկրորդ օդաչու Անդրեաս Լյուբիցի նախկին ընկերուհին պատմել է, որ ինքը պատրաստվում էր «փոխել համակարգը» եւ «տպավորիչ ժեստ» անել, որը բոլորը կհիշեն: 26-ամյա բորտ ուղեկցորդուհի Մարիա Վ.-ի վկայությամբ, Լյուբիցը կարող էր գիշերն արթնանալ ու սարսափահար գոռալ. «Մենք ցած ենք ընկնում»:
Երբ ես լսեցի աղետի մասին, ուղեղից մեջ պտտվում էր նրա ասածը, թե «Մի անգամ ես կանեմ այնպիսի բան, որը կփոխի համակարգը, եւ բոլորը կիմանան իմ անունը եւ կհիշեն ինձ»,-պատմել է երիտասարդ կինը, հաղորդում է Lenta.ru-ն՝ վկայակոչելով The Telegraph-ը:
Քննությունը պարզել է, որ վերջին թռիչքից մի քանի օր առաջ բժիշկները գտել են, որ Լյուբիցի առողջական վիճակը թույլ չի տալիս նրան աշխատել, բայց նա պատռել է տեղեկանքը: Պարզվել է նաեւ, որ օդաչուն վերջերս բաժանվել էր ընկերուհուց, եւ ըստ ամենայնի, նրան վերադարձնելու վերջին հուսահատ փորձն է արել, նրա համար Audi մեքենա գնելով: Սակայն աղջիկը մերժել է նրան եւ չի ընդունել նվերը:
Դյուսելդորֆում Լյուբիցի ծնողների բնակարանի խուզարկության արդյունքում հայտնաբերվել են բժշկական թղթեր, որոնք վկայում են նրա հիվանդության եւ նշանակված բուժումների մասին:
Այսպիսով, քննությունը պարզել է, որ օդաչուն փակ մարդ է եղել, տառապել է հոգեկան, հնարավոր է նաեւ, ֆիզիկական հիվանդությամբ:
Հիշեցնենք, որ Բարսելոնայից Դյուսելդորֆ թռչող Airbus A-320 օդանավը կործանվել է մարտի 24-ին, ֆրանսիական Ալպերում: Օդանավում եղել է 150 մարդ, որոնք բոլորը մահացել են:
Նրանցից 69-ը Գերմանիայի քաղաքացի էին, 45-ը՝ Իսպանիայի, կայնի նաեւ ԱՄՆ-ի, Ավստրալիայի, Արգենտինայի, Իրանի, վենեսուելայի, Կոլումբիայի, Մեքսիկայի, Ճապոնիայի, Ղազախստանի, Իսրայելի, Դանիայի, Նիդերլանդների եւ Բելգիայի քաղաքացիներ:
Նախնական տվյալներով, աղետի պատճառն այն է, որ երբ անձնակազմի հրամանատարը մի քանի րոպեով դուրս է եկել օդաչուների խցից, Լյուբիցը փակվել է եւ դիտավորյալ իջեցրել օդանավը:
