Փաստաբան Թամարա Յայլոյանի դեմ Փաստաբանների պալատի հարուցած կարգապահական վարույթով նախնական նախապատրաստողը արդեն իր եզրակացությունը տվել է: Այս մասին NEWS.am-ի թղթակցի հետ զրույցում ասաց փաստաբանը:
Նա նշեց, որ առաջին մասով պարզվել է, որ Թամարա Յայլոյանը մասնակցել է քննչական գործողության ոչ թե վարույթ իրականացնող մարմնի հրավերով, այլ մասնավոր անձի հրավերով, քանի որ այդ պարագայում քննությունը իրականացնողը ռուսական կողմն էր, իսկ նրան հրավիրել էր Շիրակի մարզի քննչական վարչության պետի տեղակալը: Այս մասով նախապատրաստողը որեւէ խախտում չի հայտնաբերել: Ինչ վերաբերում է երկրորդ մասին՝ Պերմյակովի պաշտպանությունից հրաժարվելուն, ապա այս մասով եզրակացրել են, որ կա վարքագծի կանոնների խախտում, բայց ելնելով գործի առանձնահատկությունից, հուզական վիճակից, դա այն խախտումը չէ, ինչ որ պետք է լինի: Այժմ այս եզրակացությունը նախապատրաստողը ուղարկել է պալատի խորհրդին, որպեսզի առաջիկայում նիստ հրավիրեն եւ որոշում կայացնեն: Թամարա Յայլյոնաը 10օրյա ժամկետում պետք է իր առարկությունները ներկայացնի՝ արդյոք համաձայն է եզրակացության հետ, թե ոչ: Փաստաբանը նշեց, որ Պերմյակովի պաշտպանությունից հրաժարվելով որեւէ մեկի շահին վնաս չի տվել եւ այդ մասով վարքագծի կանոնը խախտելը որոշ չափով պետք է բացառություն դիտարկվի:
Ավելի վաղ հայտնել էինք, որ Թամարա Յայլոյանի դեմ վարույթ հարուցելու պատճառ էր հանդիսացել այն, որ նա մեզ հետ զրույցում նշել էր, որ Վալերի Պերմյակովին իրավական օգնություն է ցույց տվել Շիրակի մարզի քննչական վարչության պետի տեղակալի հրավերով. ինչպես նաեւ հայտնել, որ հրաժարվել է Վալերի Պերմյակովին իրավական օգնություն ցույց տալուց: «Նորմալ եմ վերաբերում վարույթին, եթե ես հրաժարվել եմ, պալատը այլընտրանք չի ունեցել եւ պետք է վարույթ հարուցեր»,-ասել է փաստաբանը: