Օդեսայում սպանել են «Պասաժ» հյուրանոցի տնօրեն Ռոման Կամենյուկին եւ նրա թիկնապահին: Երկուսին էլ սպանել են դանակի հարվածներով, ընդ որում, հյուրանոցի տնօրենին՝ առանձնակի դաժանությամբ, հաղորդում է «Ինտերֆաքսը»:
Հանցագործության մասին հաղորդագրությունը Օդեսայի ոստիկանություն է ստացվել մարտի 27-ին, տեղի ժամանակով 18.20-ին: Դեպքի վայր են ժամանել ոստիկաններ, նրանք հանցագործությանն առնչություն ունեցող անձանց որոնման օպերատիվ գործողություններ են սկսել:
«Dumskaya.net» պորտալի փոխանցմամբ՝ «Պասաժի» խանութներից մեկի աշխատակիցը պատմել է, որ դեպքից բառացիորեն մի քանի րոպե առաջ տեսել է, որ տնօրենը վազում էր կենտրոնական դահլիճում: Նա հասել է հյուրանոցի սպասարահ, որտեղ էլ հենց սպանվել է:
«Պասաժ» հյուրանոցը մի ողջ թաղամաս է զբաղեցնում Դերիբասովյան եւ Պրեոբրաժենսկի փողոցների հատման վայրում: Ընկերության բաժնետոմսերի վերահսկիչ փաթեթը պատկանում է «Ուկրբուդսերվիս» ընկերությանը, եւս 24 տոկոսը պատկանում է ամերիկյան Clear Water Bay Hotels կորպորացիային: Երկու ընկերություններն էլ կապված են գործարարներ Բորիս Կաուֆմանի եւ Ալեքսանդր Գրանովսկիի հետ: