Գյումրիում Ավետիսյանների ընտանիքի սպանությունից հետո քաղաքում տեղի ունեցած բողոքի ակցիայի մասնակիցների եւ ոստիկանների միջեւ բախումների գործով մեղադրյալների թիվը 19-ն է: Այս մասին NEWS.am-ին ասաց փաստաբան Հայկ Հարությունյանը, որը գործով մեղադրյալներից Մնացական Ալեքսանյանի շահերն է ներկայացնում:
Նա նշեց, որ մեղադրյալի թիվն իրեն հայտնել է գործով քննիչը:
«Նրանցից ոչ մեկն էլ կալանավորված չէ, նրանց նկատմամբ խափանման միջոց է ընտրվել ստորագրություն չհեռանալու մասին: 19 մեղադրյալների գործը քննվում է մեկ վարույթով»,- ասաց Հայկ Հարությունյանը:
Նշենք, որ ՀՀ քննչական կոմիտեի մամուլի ծառայությունից առ այսօր ստույգ չեն հայտնել մեղադրյալների թիվը: Ի դեպ, մեղադրյալներից 3-ի անունն է հայտնի՝ Մնացական Ալեքսանյան, Անուշավան Հարությունյան եւ անչափահաս Սամվել Սարգսյան:
Հիշեցնենք, որ բախումները տեղի էին ունեցել 2015թ. հունվարի 15-ին Գյումրիում ՌԴ հյուպատոսարանի շենքի առջեւ ոստիկանների եւ ցուցարարների միջեւ: Բախումներից հետո Գյումրիի հիվանդանոց էր դիմել 33 անձ, որոնցից 23-ը ոստիկան:
Բողոքի ակցիայի մասնակիցները պահանջում էին Հայաստանին հանձնել Գյումրիում հունվարի 12-ին Ավետիսյանների ընտանիքի 7 անդամներին սպանելու համար մեղադրվող Վալերի Պերմյակովին: