Իտալիայի վերաքննիչ դատարանը մարտի 27-ին չեղյալ է հայտարարել ԱՄՆ քաղաքացի Ամանդա Նոքսի եւ նրա նախկին ընկեր Ռաֆայել Սոլեչիտոյի նկատմամբ կայացված դատավճիռը՝ բրիտանացի ուսանողուհի Մերեդիտ Քերչերի սպանության աղմկահարույց գործով:
Ֆլորենցիայի դատարանի 2014 թվականի հունվարի 30-ին կայացված նախորդ վճռով Նոքսը դատապարտվել էր 28,5 տարվա, իսկ Սոլեչիտոն՝ 25 տարվա ազատազրկման: Դրանից առաջ նրանք արդեն մեկ անգամ մեղավոր էին ճանաչվել, ապա արդարացվել, հաղորդում է Lenta.ru-ն:
Նոքսի հետ միասին վարձակալած բնակարանում ապրող Քերչերի դաժան սպանությունը տեղի է ունեցել 2007 թվականին: ՔՆնությունը պարզել է, որ 21-ամյա բրիտանուհուն սպանությունից առաջ բռնաբարել են:
2009 թվականին Նոքսը, Սոլեչիտոն եւ Կոտ դ'Իվուարի քաղաքացի Ռուդի Գեդեն մեղավոր են ճանաչվել սպանության մեջ: Նոքսը դատապարտվել է 26 տարվա, Սոլեչիտան՝ 25 տարվա, իսկ Գեդեն՝ 16 տարվա ազատազրկման: Սակայն Նոսքը դիմել է վերաքննիչ դատարան եւ 2011 թվականի հոկտեմբերին դատարանը որոշել է, որ ամերիկուհու եւ իտալացու մեղքն ապացուցող բավարար հիմքեր չկան:
2013-ի մարտին Իտալիայի վերաքննիչ դատարանը չեղյալ է հայտարարել նրանց արդարացման դատավճիռը՝ հանձնարարելով նորից քննել գործը: