The Washington-ին տված հարցազրույցում Իգոր Կոլոմոյսկին հայտարարել է, որ Դնեպրոպետրովսկի մարզի նահանգապետի պաշտոնից հրաժարական է տվել՝ անջատողականության մեջ մեղադրվելու մտահոգության պատճառով: Կոլոմոյսկին «Ուկրնաֆթա» ընկերության շուրջ կոնֆլիկտը բացատրել է շահերի բախմամբ: Նա նաեւ «Նավթոգազ»-ին մեղադրել է «Ուկրնաֆթա»-ից 4 մլրդ դոլարի բնական գազ գողանալու մեջ:
Կոլոմոյսկիի խոսքով, «Ուկրնաֆթա»-ի գրասենյակի առջեւ տեղի ունեցած միջադեպից հետո լրատվամիջոցներում «տեղեկատվական խրախճանք» սկսվեց: Նախկին նահանգապետը նշել է, որ իրեն միշտ գործարար է համարել, այլ ոչ թե քաղաքական գործիչ, եւ կարծում է, որ իրավիճակը հեռուն է գնացել, եւ իրեն կարող էին մեղադրել անջատողականության մեջ:
Իգոր Կոլոմոյսկին չի բացառել, որ ինքն ու իր տեղակալները կարող էին «որեւէ սխալ բան» անել, քանի որ անկախ դիրքորոշում ունեին Ուկրաինայի նախագահ Պյոտր Պորոշենկոյից: «Ես նրա ենթական էի, բայց նրան հավասար էի հանդես գալիս: Եվ նա դրանից լավ չէր զգում»,- ասել է նախկին նահանգապետը:
«Պորոշենկոն երկար ժամանակ համբերատար էր ինձ հետ: Եթե ես նրա տեղում լինեի, երեք ամիս անց ինձ կազատեի պաշտոնից»,- ամփոփել է օլիգարխը:
Հիշեցնենք, որ մարտի 25-ին հայտնի դարձավ, որ Իգոր Կոլոմոյսկին հրաժարական է ներկայացրել Դնեպրոպետրովսկի նահանգապետի պաշտոնից: Պյոտր Պորոշենկոն ընդունել է հրաժարականը: