Նիգերիայում մեկնարկել են նախագահական եւ խորհրդարանական ընտրությունները: Երկրի ղեկավարի ընտրությունները նախատեսված էր փետրվարի 14-ին, բայց իսլամիստական «Բոկո Հարամ» խմբավորման դեմ պայքարի պատճառով տեղափոխվել է այսօր՝ մարտի 28-ին:
Նշվում է, որ որոշ տեղամասեր դեռեւս չեն բացվել ընտրական հանձնաժողովների ներկայացուցիչների ուշացման եւ փաստաթղթերի ուղարկման հետ կապված դժվարությունների պատճառով:
Նախագահի թեկնածուների թիվը 14 է, որոնց թվում է նաեւ գործող նախագահ Գուդլաք Ջոնաթանը: Նրան լուրջ մրցակից է համարվում ընդդիմադիր թեկնածու Մոհամադ Բուհարին:
Վերլուծաբանները նշում են, որ սա ամենալարված նախագահական ընտրապայքարն է երկրի անկախությունից ի վեր, հաղորդում է BBC-ն:
Ավելի վաղ «Բոկո Հարամ» խմբավորման առաջնորդ Աբուբաքար Շեքաուն խոստացել էր խափանել ընտրությունները: Անվտանգության նկատառումներից ելնելով, երկրի իշխանությունները հրահանգել են մարտի 25-ի կեսգիշերից փակել երկրի բոլոր ցամաքային ու ծովային սահմանները:
