Աշոտ Նավասարդյանը դեմ չէր լինի Հայաստանի անդամակցությանը ԵՏՄ-ին։ Այս մասին այսօր՝ մարտի 28-ին, Աշոտ Նավասարդյանի 65-րդ տարեդարձին, լրագրողների հետ զրույցում ասաց ԱԺ նախագահ Գալուստ Սահակյանը։
«Աշոտ Նավասարդյանի համար, բնականաբար, ընդունելի կլիներ Հայաստանի անդամակացությունը ԵՏՄ-ին, նամանավանդ՝ փորձառու քաղաքական գործիչները շատ լավ գիտակցում են, որ պետության մեկուսացումը նշանակում է պետության կործանում: Այսօր համագործակցելով՝ մենք մեր օգուտներն ենք տեսել, և ԵՏՄ-ի անդամ երկրներն էլ նույն ձևով իրենց շահերն են տեսնում»,-ասաց ԱԺ նախագահ Գալուստ Սահակյանը։
Նրա խոսքով՝ կարծիքը, որ Հայաստանը անդամակցելով ԵՏՄ-ին կկորցնի իր անկախությունը, տեղին չէ։
«Այն մտածմունքները, որ Հայաստանը կկորցնի իր անկախությունը տեղին չեն, բնավ այդ խնդիրը չկա, ու բնավ որևէ պետություն չի ցանկանում, որ Հայաստանը միանա իրեն կամ անկախությունից զրկվի։ Եթե պետություն ես և որևէ փոխհարաբերություններ չես ստեղծում, ուրեմն, դու պետություն չես, արդեն կործանվում ես: Ամենահզոր պետությունները նույնիսկ փոխշահավետ համագործակցություններում ինչ-որ մի բան զիջում են՝ ինչ-որ ավելի մեծ բան գտնելու համար»,-ասաց ԱԺ նախագահը։
Աշոտ Նավասարդյանը եղել է ընդհատակյա Ազգային միացյալ կուսակցության (ԱՄԿ, 1968) եւ խորհրդի (1973) անդամ։ Հետագայում հետեւել է Գարեգին Նժդեհի «Ցեղակրոն» գաղափարախոսությանը, հանդես եկել խորհրդային ամբողջատիրական համակարգի քննադատությամբ, Հայ դատի պաշտպանությամբ։ 1990թ.-ից եղել է Հանրապետական կուսակցության հիմնադիր նախագահը։ Իր գաղափարների տարածման համար երեք անգամ կալանավորվել է եւ դատապարտվել 17 տարվա ազատազրկման ու 5 տարի աքսորի։ Մասնակցել է Հայաստանի պաշտպանության եւ Արցախի ազատագրման մարտերին Երասխավանից մինչեւ Մարտակերտ, Քարվաճառ, Լաչին, Շուշի եւ այլն։ Պարգեւատրվել է 1-ին աստիճանի Մարտական խաչով։ Հանկարծամահ է եղել 1997թ. նոյեմբերի 3-ին 47 տարեկան հասակում։