Սյունիքի մազպետ Սուրեն Խաչատրյանի տան մոտ տեղի ունեցած ողբերգական դեպքով Բուդաղյանների դիմումը փաստաբան Հայկ Ալումյանը մարտի 18-ին անձամբ է մուտք արել Մարդու իրավունքների Եվրոպական դատարան: Այս մասին NEWS.am-ի թղթակցի հետ զրույցում ասաց փաստաբանը:
Նա նշեց, որ այժմ ՄԻԵԴ-ում ընթացակարգերը ավելի արագանում են, գործերը կսկսեն ավելի արագ քննել, այլեւս կարիք չի լինի սպասել տարիներ շարունակ: Հայկ Ալումյանը հույս ունի, որ մինչեւ տարեվերջ նորություն կունենա ՄԻԵԴ-ից, պարզ կլինի՝ վարույթ ընդունել են, թե ոչ: Նա կարծիք հայտնեց, որ դիմումը վարույթ կընդունվի, քանի որ դրա համար բոլոր նախադրյալները տեսնում է:
Նշենք, որ Բուդաղանները պահանջում են ճանաչել Մարդու իրավունքների եվրոպական կոնվենցիայի մի քանի հոդվածների խախտում: Այդ հոդվածները վերաբերում են արդար դատաքննության իրավունքին, անմեղության կանխավարկածի, ինչպես նաեւ կյանքի իրավունքի խախտմանը: Բուդաղյանների հայրը վիճարկում է Ավետիք Բուդաղյանի վերաբերյալ կայացրած քննիչի որոշումը, ըստ որի՝ վերջինիս մեղավոր է ճանաչվել սպանության փորձի համար:
Հիշեցնենք, որ հունիսի 2-ին՝ ժամը 00:10-ի սահմաններում, Սյունիքի մարզպետ Սուրեն Խաչատրյանի տան մոտ հնչել են կրակոցներ, որի հետեւանքով 1 մարդ մահացել էր, եւս 2 մարդ հրազենային վնասվածքներով տեղափոխվել են Գորիսի բժշկական կենտրոն: Մահացածը Գորիսի քաղաքապետի նախկին թեկնածու Ավո Բուդաղյանն է, իսկ վիրավորներից մեկը՝ նրա եղբայրը՝ Արտակ Բուդաղյանը, ով ԼՂՀ N զորամասի հրամանատար է, մյուս վիրավորը՝ Նիկոլայ Աբրահամյանն է, ով Սյունիքի մարզպետ Սուրեն Խաչատրյանի ազգականն է եւ թիկնապահը: Կրակոցները հնչել են «Բերետա» տեսակի ատրճանակից եւ որսորդական հրացանից:
Փաստի առթիվ հարուցվել է քրեական գործ՝ ՀՀ քրօրի 104 հոդվածի 1-ին մասի (սպանություն) եւ 235 հոդվածի (ապօրինի զենք, զինամթերք կրելը, պահելը, օգտագործելը) հատկանիշներով: Գորիսում հայտնի Սդղի լճում խնջույք էր եղել, որին մասնակցել է նաեւ ԼՂՀ նախագահ Բակո Սահակյանը: Վեճ էր ծագել, որը շարունակվել էր Սյունիքի մարզպետի տան մոտ: Դեպքի կապակցությամբ ձերբակալվել, ապա կալանավորվել էր Սյունիքի մարզպետի թիկնապահ Զարզանդ Նիկողոսյանը եւ Սուրեն Խաչատրյանի որդին` 19-ամյա Տիգրան Խաչատրյանը: Հունիսի 6-ին Կառավարությունն ընդունեց Սուրեն Խաչատրյանի` աշխատանքից ազատման դիմումը:
Արտակ Բուդաղյանին հուլիսի 9-ին մեղադրանք է առաջադրվել Քր.օր.-ի 137-րդ հոդվածի 1-ին մասի հատկանիշներով (Սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու իրական վտանգ է եղել): Նրա նկատմամբ որպես խափանման միջոց է ընտրվել չհեռանալու ստորագրությունը:
Նշենք, որ Բուդաղյանների փաստաբանը դիմել էր Արաբկիր եւ Քանաքեռ-Զեյթուն ընդհանուր իրավասության դատարան՝ բողոքարկելով քննիչի երեք որոշումները: Նրանք բողոքարկել են քննիչի երկու որոշումները, որոնք վերաբերում էին Սուրեն Խաչատրյանի որդու՝ Տիգրան Խաչատրյանի եւ թիկնապահ Զարզանդ Նիկողոսյանի նկատմամբ քրեական հետապնդումը դադարեցնելուն: Երրորդ որոշումը, որը նրանք բողոքարկել են, վերաբերում էր մահացած Ավետիք Բուդաղյանի նկատմամբ քրեական հետապնդում չիրականացնելուն:
