«Հիմնադիր խորհրդարանը» տարածել է երիտասարդի լուսանկարը, որը, նրանց պնդմամբ, այսօր` մարտի 28-ին, Գյումրիում իրենց հրավիրած հանրահավաքի ժամանակ դանակահարել է «Հիմնադիր խորհրդարանի» անդամ Հրաչիկ Միրզոյանին:
«Հիմնադիր խորհրդարանի» անդամ Վարդան Հակոբյանի խոսքով, Հրաչիկ Միրզոյանը հաստատել է, որ հենց լուսանկարում պատկերված երիտասարդն է իրեն դանակահարել:
NEWS.am-ին չհաջողվեց Գյումրիի ոստիկանությունից պարզաբանում ստանալ, Շիրակի ոստիկանապետ Վարդան Նադարյանը միայն ասաց, որ այժմ որոնողական աշխատանքներ են կատարվում: Նշենք, որ Հրաչիկ Միրզոյանին այժմ Գյումրու բժշկական կենտրոնում պատրաստում են վիրահատության։
Նշենք, որ Գյումրիի թատերական հրապարակում, այսօր` մարտի 28-ի, «Հիմնադիր խորհրդարանի» հրավիրած հանրահավաքի ժամանակ միջադեպ է տեղի ունեցել. մի խումբ երիտասարդներ ձվեր են նետել հանրահավաքի մասնակիցների ուղղությամբ, անհայտ անձը դանակահարել է «Հիմնադիր խորհրդարանի» անդամներից Հրաչիկ Միրզոյանին։ «Հիմնադիր խորհրդարանը» Երեւանից մեկնել էր Գյումրի «Հարյուրամյակն առանց ռեժիմի» շարժման մասին իրազեկման հանրահավաք անցկացնելու։