«Հիմնադիր խորհրդարանի» և ժողովրդի միջև պայմանագիր է կնքվելու: Այս մասին, այսօր` մարտի 28-ին, Գյումրիի թատերական հրապարակում «Հիմնադիր խորհրդարանի» հրավիրած հանրահավաքի ժամանակ ասաց «Հիմնադիր Խորհրդարանի» նախագահի տեղակալ Վարուժան Ավետիսյանը:
«Համաձայն այդ պայմանագրի ժողովուրդը պահանջատեր է լինելու, իսկ «Հիմնադիր խորհրդարանը» պարտավորվում է ռեժիմին հեռացնելուց հետո թալանվածը վերադարձնել ժողովրդին, օտար պետություններին ծառայողներին բացահայտել ու ժողովրդի դատին հանձնել: Վերջապես պետք է հասկանանք, որ առանց օտարներից կախված պորտալարերը կտրելու ոչ մի տեղ չենք կարողանա գնալ: Այս պայմանագիրը , ըստ էության, ժամանակավոր Սահմանադրություն է: Պայմանագրի համաձայն, գործող իշխանության պետական կառավարման համակարգին վերաբերող մասը ուժը կորցնելու է: Ուժի մեջ են մնալու միայն Սահմանադրության 1 և 2 գլուխները: Պետությունը կառավարվելու է այլ եղանակով, այլ կերպ. նախագահի ինստիտուտ չի լինելու, այն բաշխվելու է «Հիմնադիր խորհրդարանի» և անցումային կառավարության վրա»,-ասաց Վարուժան Ավետիսյանը` հավաքվածներին Ապրիլի 24-ին հրավիրելով Երևանում կայանալիք խաղաղ ցույցին:
Հիշեցնենք, որ Գյումրիի թատերական հրապարակում, այսօր` մարտի 28-ի, «Հիմնադիր խորհրդարանի» հրավիրած հանրահավաքի ժամանակ միջադեպ է տեղի ունեցել. մի խումբ երիտասարդներ ձվեր են նետել հանրահավաքի մասնակիցների ուղղությամբ, անհայտ անձը դանակահարել է «Հիմնադիր խորհրդարանի» անդամներից Հրաչ Միրզոյանին։ «Հիմնադիր խորհրդարանը» Երեւանից մեկնել էր Գյումրի «Հարյուրամյակն առանց ռեժիմի» շարժման մասին իրազեկման հանրահավաք անցկացնելու։