Չինաստանի պատվիրակությունը Լոզանում Իրանի միջուկային ծրագրի շուրջ բանակցությունների վերջին փուլում խնդրի լուծման առաջարկություններ է ներկայացրել: Այս մասին լրագրողներին տեղեկացրել է Չինաստանի ԱԳՆ քաղաքական տնօրեն Վան Ցունը:
Նրա խոսքով, Չինաստանի ԱԳ նախարար Վան Ին մեկնել է Լոզանում անցկացվող բանակցություններին մասնակցելու: Չինական պատվիրակությունն առաջարկություններ է ներկայացրել, որոնք օգնում են հարթել բանակցությունների վերջին փուլում տարաձայնությունները: Նա նշել է, որ մարտի 29-ին նախանշված են Վան Իի երկկողմ հանդիպումները Իրանի ԱԳ նախարար Մոհամմադ Ջավադ Զարիֆի, ԱՄՆ պետքարտուղար Ջոն Քերրիի եւ բանակցությունների այլ մասնակիցների հետ:
Մարտի 28-ին Լոզան են ժամանել նաեւ Գերմանիայի ԱԳ նախարար Ֆրանկ-Վալտեր Շթայնմայերը եւ Ֆրանսիայի ԱԳ նախարար Լորան Ֆաբիուսը: Արդեն կայացել է նրանց երկկողմ հանդիպումը, ծրագրվում է նաեւ հանդիպում ԱՄՆ պետքարտուղար Ջոն Քերրիի հետ, որն արդեն երրորդ օրն է՝ բանակցում է Իրանի ԱԳ նախարար Մոհամմադ Ջավադ Զարիֆի հետ:
Ավելի վաղ Իրանի ԱԳ նախարարի տեղական Աբբաս Արակչին ՌԻԱ Նովոստիին հաղորդել էր, որ մարտի 29-ին Լոզանում սպասվում է «վեցյակի» բոլոր ԱԳ նախարարների ժամանումը (Ռուսաստան, ԱՄՆ, Չինաստան, Ֆրանսիա, Մեծ Բրիտանիա եւ Գերմանիա):