Երեւանում, այսօր՝ մարտի 28-ին, Խորեն Հովհաննիսյանի 60-ամյակի առթիվ ԽՍՀՄ-ի եւ աշխարհի նախկին անվանի ֆուտբոլիստների հանդիպումից առաջ զվարճալի դեպք է տեղի ունեցել, որը ֆիքսել է NEWS.am-ի ֆոտոխցիկը:

Աշխարհի հավաքականի գլխավոր մարզիչ, «Սովետսկի Սպորտի» ֆուտբոլային փորձագետ եւ Մոսկվայի «Սպարտակի» նախկին ֆուտբոլիստ Եվգենի Լովչեւ «Արմենիա» հյուրանոցի սպասասրահում տեսնելով իտալացի հայտնի ֆուտբոլիստ Մարկո Մատերացիին, որոշել է բեմադրել դեռեւս 2006 թվականին Աշխարհի առաջնության Ֆրանսիա-Իտալիա խաղի ժամանակ Զինեդին Զիդանի եւ Մարկո Մատերացիի միջեւ տեղի ունեցած միջադեպը, որը մեծ աղմուկ էր բարձրացրել աշխարհում:

Եվգենի Լովչեւը անակնկալ մոտեցել է Մատերացիին եւ ճիշտ Զիդանի նման գլխով հարվածել նրա կրծքավանդակին:

Հիշեցնենք, որ 2006 թվականի աշխարհի առաջնության ժամանակ Ֆրանսիա-Իտալիա խաղի ժամանակ Մատերացին հայհոյել էր Զինեդին Զիդանին, որից հետո Զիդանը շրջվել էր եւ գլխով այնպես հարվածել Մատերացիին, որ վերջինս գետնին էր տապալվել: Զիդանը այդ արարքի համար կարմիր քարտ էր ստացել ու հեռացվել խաղադաշտից: Հետագայում պարզվել էր նման արարքի պատճառը:

Լուսանկարը՝  Արսեն  Սարգսյանի/NEWS.am