Լրատվամիջոցներում մանրամասներ են հայտնվել Բորիս Նեմցովի սպանության մեջ կասկածվող Զաուր Դադաեւի հարցաքննությունից: Դադաեւը, մասնավորապես, հաղորդել է, որ սպանությունն իրականացնելու համար իրեն 5 մլն ռուբլի են խոստացել, սակայն Նեմցովին սպանել է ոչ թե փողի համար, այլ կրոնական նկատառումներից ելնելով: Դադաեւը խնդրել է արձանագրության մեջ եւս մեկ նախադասություն ներառել. «Ներողություն եմ խնդրում Բարձրյալից՝ Նեմցովի կյանքը խլելու համար»: Այս մասին գրում է «Կոմերսանտը»:
Դադաեւը պատմել է, որ հունվարի 7-ին իմացել է, որ Նեմցովը «հրապարակայնորեն արդարացրել է Charlie Hebdo խմբագրությունում տեղի ունեցածը»: Հունվարի 9-ին նա ժամանել է Մոսկվա եւ հանդիպել Չեչնիայից համերկրացիների հետ, եւ որոշել են հետեւել Նեմցովին: Արդյունքների մասին Դադաեւը պատմել է Ռուսիկ ազգանունով մեկին: Վերջինը մի քանի օր անց զանգահարել է եւ տեղեկացրել, թե որտեղ է գտնվում ZAZ Chance ավտոմեքենան՝ ուղեւորի աջ նստատեղի տակ թաքնված ատրճանակով:
Փետրվարի 27-ին ժամը 21-ին Դադաեւին զանգահարել է Բեսլան Շավանովը՝ տեղեկացնելով, որ «գործիչն ինչ-որ աղջկա հետ նստած է Կարմիր հրապարակում»: Խմբի եւս մեկ անդամ՝ Անզոր Գուբաշովը, ZAZ Chance-ով վերցրել է Դադաեւին, եւ նրանք գնացել են Կրեմլի ուղղությամբ:
Այնուհետեւ Շավաշովը զանգահարել եւ տեղեկացրել է, որ Նեմցովն ու նրա ընկերուհին Կարմիր հրապարակով ուղղվում են դեպի կամրջի ուղղությամբ, եւ խումբը նույնպես շարժվել է դեպի կամուրջ: Դադաեւը դուրս է եկել կամրջի մոտ եւ ատրճանակը ձեռքին հետեւել Նեմցովին: Որոշել է կրակել կամրջի վրա:
Հասնելով զույգին՝ Դադաեւը ձախ ձեռքով հանել է ատրճանակը (նա ձախլիկ է), իսկ աջով՝ հեռախոսը: Մեջքից կրակելով գործչին՝ նա հեռախոսով ասել է. «Մոտեցիր»: Ընկնելով՝ վիրավոր Նեմցովը ցած է գցել աղջկան, այնուհետեւ փորձել է բարձրանալ տեղից: Տեսնելով դա՝ Դադաեւը եւս մի քանի անգամ կրակել է զոհի վրա: Այնուհետեւ նստել է ավտոմեքենան, որտեղ գտնվել են Անզոր Գուբաշովն ու Բեսլան Շավանովը: