Ռուսաստանի եւ Հայաստանի պատգամավորները կոչ են արել Հայոց ցեղասպանության 100-րդ տարելիցի նախաշեմին ճանաչել եւ դատապարտել մարդկության դեմ իրագործված սարսափելի հանցագործությունը: Նման ձեւակերպում կա մարտի 28-ին Երեւանում Ռուսաստանի Պետդումայի ԱՊՀ հարցերի, եվրասիական ինտեգրման եւ հայրենակիցների հետ կապերի հանձնաժողովի եւ Հայաստանի Ազգային Ժողովի արտաքին հարաբերությունների հանձնաժողովի համատեղ նստաշրջանի արդյունքներով ընդունված հուշագրում:
Նշենք, որ օրվա ընթացքում կողմերը քննարկել էին այս ձեւակերպումը, եւ այն հուշագրի երկրորդ կետը դարձրել:
Նստաշրջանի ռուսական համանախագահ, ՌԴ ԱՊՀ հարցերի, եվրասիական ինտեգրման եւ հայրենակիցների հետ կապերի հանձնաժողովի նախագահ Լեոնիդ Սլուցկին նշել է, որ այդ արել են՝ հայկական կողմի հանդեպ հարգանքից ելնելով: