Եվրասիական տնտեսական միությունում Հայաստանի դերի նսեմացման մասին հայտարարությունները վտանգավոր սադրանք են: Այս մասին մարտի 28-ին Երեւանում Հայաստանի Ազգային ժողովի արտաքին հարաբերությունների հանձնաժողովի հետ համատեղ նիստում հայտարարեց ՌԴ Պետդումայի ԱՊՀ հարցերի, եվրասիական ինտեգրման եւ հայրենակիցների հետ կապերի հանձնաժողովի նախագահ Լեոնիդ Սլուցկին:
Պատասխանելով հարցին, արդյո՞ք Աստանայում Պուտին-Լուկաշենկո-Նազարբաեւ ձեւաչափով հանդիպումը Հայաստանի կարեւորության նսեմացում չէ, Սլուցկին նշեց, որ պետությունների ղեկավարների հանդիպումը եվրասիական կարգավիճակ չի ունեցել: Դրա համար ԵՏՄ Բարձրագույն տնտեսական խորհրդի ձեւաչափ գոյություն ունի:
Իսկ Հայաստանը ոչ միայն կարեւոր, այլեւ լիիրավ գործընկեր է, եւ ոչ թե այդպիսին է համարվում, այլ այդպիսին է:
Պատգամավորի խոսքով, Աստանայում երեք երկրների ղեկավարները հանդիպել են՝ քննարկելու դեռեւս նախորդ տարիներից մնացած խնդիրները, մասնավորապես՝ եվրասիական ինտեգրման հարցում Ղազախստանի ոգեւորության սառեցման հարցը:
Նա հիշեցրեց, որ Ղազախստանը եվրասիական ինտեգրման առաջին նախաձեռնողներից էր: Հենց Նուրսուլթան Նազարբաեւն է ժամանակին առաջարկել Եվրասիական խորհրդարանի եւ միասնական արժույթի գաղափարը: Սակայն 2012 թվականից ղազախական կողմն այդ հարցերի շուրջ ավելի զուսպ է արտահայտվում:
«Հենց այս հարցերն էլ քննարկել ենք: Եվ ոչ ոք չի ասել եւ չի մտածել. ահա մենք երեքով հավաքվում ենք, իսկ չորրորդը թող սպասի: Նման խոսակցությունները չափազանց վտանգավոր սադրիչ գնահատական են»,- հավելեց նա:
