Գյումրիում այսօր՝ մարտի 28-ին, «Հիմնադիր խորհրդարանի» հանրահավաքի ժամանակ դանակահարված՝ կառույցի անդամներից Հրաչիկ Միրզոյանի ծանր կայուն է։ Այս մասին NEWS.am-ին հայտնեց «Հիմնադիր խորհրդարանի» պատգամավոր Վարդան Հակոբյանը՝ նշելով, որ նա գտնվում է Գյումրիի բժշկական կենտրոնի վերակենդանացման բաժանմունքում։

Հիշեցնենք, որ Հրաչիկ Միրզոյանի մոտ դանակահարությունից հետո ներքին արյունահոսություն էր սկսվել: Նրան Գյումրիի թատերական հրապարակից «Շտապօգնության» մեքենայով տեղափոխել էին Գյումրիի բժշկական կենտրոն, որտեղ հեռացրել էին նրա փայծաղը։

Նշենք, որ հիմնադիր խորհրդարանի անդամներն արդեն հասել են Երեւան: Մայրաքաղաքի ճանապարհին անհայտ անձինք ավտոմեքենաներից ընթացքի մեջ ձվերով հարվածել են «Հիմնադիր խորհրդարանի» ավտոշարասյան մեքենաներին։

Ազատան գյուղի մոտ էլ անհայտ անձինք քարկոծել էին Գյումրիի հանրահավաքից հետո Երեւան վերադարձող «Հիմնադիր խորհրդարանի» ավտոշարասյան վերջին երկու մեքենաները։

Ինչպես ավելի վաղ հաղորդել էինք, միջադեպ էր տեղի ունեցել նաեւ Գյումրիի թատերական հրապարակում «Հիմնադիր խորհրդարանի» հրավիրած հանրահավաքի ժամանակ. մի խումբ երիտասարդներ ձվեր են նետել հանրահավաքի մասնակիցների ուղղությամբ, անհայտ անձը դանակահարել է «Հիմնադիր խորհրդարանի» անդամներից Հրաչիկ Միրզոյանին։ «Հիմնադիր խորհրդարանը» Երեւանից մեկնել էր Գյումրի՝ «Հարյուրամյակն առանց ռեժիմի» շարժման մասին իրազեկման հանրահավաք անցկացնելու։