Նեմցովի սպանության գործում նոր ֆիգուրանտ է հայտնվել։ Հետաքննությունը պարզել է Ռուսլիկ մականունով անձի ինքնությունը, որը, համաձայն Զաուր Դադաեւի ցուցմունքի, զինել է հանցագործության մասնակիցներին եւ խոստացել ֆինանսավորել։ Այս մասին գրում է «Կոմերսանտ» պարբերականը՝ վկայակոչելով հետաքննությանը մոտ գտնվող իր աղբյուրները։
Համաձայն այդ աղբյուրների՝ Քննչական կոմիտեին հաջողվել է պարզել այդ անձնավորության անունը եւ ազգանունը, սակայն այս պահին հրաժարվում է հրապարակել այդ տվյալները։ Հայտնի է միայն, որ նա մեղադրյալների հայրենակիցն է։ Նրա հանդեպ հետախուզում չի հայտարարվել, քննիչները դեռեւս փաստեր են հավաքում սպանության մեջ նրա հնարավոր մասնակցությունը ապացուցելու համար։
Ավելի վաղ հայտնի էր դարձել, որ Դադաեւը խոստովանել է, որ սպանությունը կազմակերպելու գործում իրեն օգնել է Չեչնիայի բնակիչ ոմն Ռուսիկ, որը Դադաեւին տրամադրել է ատրճանակ ու ZAZ Chance մեքենա, որի միջոցով մարդասպանը դեպքի վայրից դիմել էր փախուստի։ Դադաեւի ցուցմունքից հետեւում է, որ ատրճանակը սպանությունից մի քանի ժամ անց իր մոտից վերցրել էր Ռուսիկի ուղարկած մարդը, իսկ ինքը Ռուսիկը Դադաեւին տարել էր օդանավակայան, որտեղից էլ նա մեկնել էր Գրոզնի։
Այս պահին Նեմցովի սպանության գործում կա 5 ֆիգուրանտ՝ Զաուր Դադաեւը, Թամերլան Էսկերխանովը, Համզաթ Բախաեւը եւ եղբայրներ Անզոր ու Շահիդ Գուբաշեւները։ Անցյալ շաբաթ Նեմցովի սպանության գործով հարցաքննվել էր «Հյուսիս» գումարտակի՝ Դադաեւի ծառայակից Ռուսլան Գերեմեեւը։