Մայր Աթոռ Սուրբ Էջմիածնի Հին ճեմարանի դահլիճում «Dasaran» կրթական ծրագրի հիմնադիր նախագահ Սուրեն Ալոյանը եւ Մայր Աթոռ Սուրբ Էջմիածնի Քրիստոնեական դաստիարակության կենտրոնի տնօրեն Տեր Վարդան եպիսկոպոս Նավասարդյանը կնքեցին փոխըմբռնման հուշագիր:
Կողմերի միջեւ կնքված հուշագիրը նպատակաուղղված է հանրակրթական դպրոցներում քրիստոնեական դաստիարակության առավել ակտիվ իրականացմանը, աշակերտներին Հայ Առաքելական Եկեղեցուն հաղորդ դարձնելուն, քրիստոնեական արժեքները սերմանելուն, բարոյապես հարստացած ապագա քաղաքացիներ դաստիարակելուն:
Ըստ ստորագրված հուշագրի՝ «Dasaran» կրթական ծրագրի կայքում ստեղծվելու է «Հոգեւոր անկյուն» պաշտոնական էջը, որի շնորհիվ աշակերտները կհամալրեն իրենց գիտելիքները հոգեւոր-ճանաչողական տեղեկատվությամբ, կծանոթանան Հայ առաքելական եկեղեցու դերին եւ նշանակությանը, եկեղեցական տոներին, Հայ Եկեղեցու խորհուրդներին եւ հատուկ արարողություններին:
«Dasaran» կրթական ծրագրի եւ Քրիստոնեական դաստիարակության կենտրոնի ներկայացուցիչները, արժեւորելով հոգեւոր դաստիարակության ոլորտում աշակերտների ակտիվ ներգրավվածությունը եւ ցուցաբերած հետաքրքրությունը, համաձայն փոխըմբռնման հուշագրի՝ խրախուսելու են «Հոգեւոր անկյուն» պաշտոնական էջի առավել ակտիվ մասնակից աշակերտներին՝ հնարավորություն տալով նրանց այցելելու Մայր Աթոռ Սուրբ Էջմիածնի թանգարան ու գանձարան եւ մասնակցելու ինտերակտիվ-ճանաչողական շրջայցի:
Կարեւորելով նաեւ արտացանցային տարբերակով՝ դպրոցում դասավանդվող «Հայոց եկեղեցու պատմություն» առարկայի ուսուցանմամբ քրիստոնեական գիտելիքների փոխանցումը եւ աշակերտների հոգեւոր իմացության ընդլայնումը, կողմերի միջեւ կնքված հուշագիրը նախատեսում է եւս մեկ ծրագրի իրականացում:
Ըստ այդ ծրագրի՝ վերոնշյալ առարկայից տարեկան կտրվածքով լավագույն ցուցանիշներ գրանցած աշակերտներին հնարավորություն կընձեռվի դառնալու մասնակիցը «Մեկ օր Մայր Աթոռում» խորագրով ինտերակտիվ շրջայցի, որի ընթացքում դպրոցականներն առավել մանրամասն կծանոթանան եկեղեցուն եւ նրա դարավոր առաքելությանը:
