Գյումրիում Ավետիսյանների ընտանիքի սպանությունից հետո քաղաքում տեղի ունեցած բողոքի ակցիայի մասնակիցների եւ ոստիկանների միջեւ բախումների գործով մեղադրանք առաջադրված երիտասարդներն արտագնա աշխատանքով զբաղվողներ են: Այս մասին այսօր՝ մարտի 30-ին, լրագրողներին ասաց Գյումրիի ժուռնալիստների «Ասպարեզ» ակումբի նախագահ Լևոն Բարսեղյանը:
Նա հայտնեց, որ մեղադրյալների մի մասին անձամբ ճանաչում է, զրուցել է նրանց հետ եւ իր համար անհասկանալի է, թե ինչու է այդ երիտասարդներին մեղադրանք առաջադրվել:
«Այդ մարդիկ կարծես թե պատանդ վերցված լինեն: Խոպանի տոմս գնած, տոմսը հետ տված եւ այժմ տանը նստած մարդիկ են նրանք: Եթե Երեւանում ցույց է լինում օրինակ դեսպանատան առջեւ, ոստիկանները փակում են այդ կառույցի մատույցները, իսկ Գյումրիում փակեցին մի ամբողջ փողոց, փողոց, որը մեծ նշանակություն ունի ամբողջ մարզի համար: Բախումների օրն էլ ոստիկանները փողոց էին դուրս եկել՝ առանց սաղավարտների: Հենց օրինակ այն ոստիկանը, որի գլուխն էր պատռվել եւ որը հետագայում բնակարան ստացավ, չի ներկայացել, չի ասել, որ ոստիկան է»,- ասաց Լեւոն Բարսեղյանը:
Նրա խոսքով՝ հունվարի 15-ին ոստիկանների գործողություններն ապօրինի են եղել, իսկ ցուցարարներն էլ ամենեւին ոստիկանին ծեծելու ցանկությամբ չեն փողոց դուրս եկել:
«Նրանք ընդամենը պաշտպանվել են: Նույնիսկ կադրերում չկան, որ այս կամ այն մեղադրյալը բռնություն է գործադրել ոստիկանների նկատմամբ»,- ավելացրեց նա:
Նշենք, որ մեղադրյալների թիվը պաշտոնապես չեն հայտնում: NEWS.am-ին, սակայն, մեղադրյալներից Մնացական Ալեքսանյանի փաստաբան Հայկ Հարությունյանը, հայտնել է, որ նրանց թիվը 19-ն է:
Ի դեպ, մեղադրյալներից 3-ի անունն է հայտնի՝ Մնացական Ալեքսանյան, Անուշավան Հարությունյան եւ անչափահաս Սամվել Սարգսյան:
Հիշեցնենք, որ բախումները տեղի էին ունեցել 2015թ. հունվարի 15-ին Գյումրիում ՌԴ հյուպատոսարանի շենքի առջեւ ոստիկանների եւ ցուցարարների միջեւ: Բախումներից հետո Գյումրիի հիվանդանոց էր դիմել 33 անձ, որոնցից 23-ը ոստիկան:
Բողոքի ակցիայի մասնակիցները պահանջում էին Հայաստանին հանձնել Գյումրիում հունվարի 12-ին Ավետիսյանների ընտանիքի 7 անդամներին սպանելու համար մեղադրվող Վալերի Պերմյակովին: