Փարիզի քաղաքապետարանում Հայոց ցեղասպանության զոհերի հիշատակի ցուցահանդես կկազմակերպվի: Այս մասին, այսօր՝ մարտի 30-ին, լրագրողների հետ հանդիպման ժամանակ նշել է Հայոց ցեղասպանության թանգարան-ինստիտուտի տնօրեն Հայկ Դեմոյանը: Ցուցահանդեսը տեղի է ունենալու ապրիլի 29-ից մինչեւ հուլիսի 4-ը: Ցուցահանդեսում ներկայացված կլինեն թանգարանային նմուշներ ու լուսանկարներ, որոնք կվկայեն Օսմանյան Կայսրությունում հայերի հանդեպ կատարված դաժան սպանությունների մասին:
Ցուցահանդեսը կունենա 150 էքսպոնատ, որոնք մեծ մասը առաջին անգամ է ցուցադրվելու արտերկրում:
Ցուցահանդեսում հատուկ տեղ կհատկացվի Ավրորա Մարտիգանյանի անձնական իրերին, ով հրաշքով փրկվել է Ցեղասպանությունից ու հայտնվել ԱՄՆ-ում: Այստեղ նա 1919-ին նկարահանվել է Հայոց ցեղասպանության մասին առաջին ֆիլմում («Հոգիների աճուրդ»):