Հակառակորդի հատուկ նշանակության ջոկատի ուժեղացված խմբի՝ մարտի 19-ին ձեռնարկած հարձակման հետեւանքով վիրավորված, Ստեփանակերտի հոսպիտալում բուժվող Գոռ Դարմանյանը Արագածոտնի մարզի Թալին քաղաքից է, ընտանիքի միակ արու զավակը: NEWS.am-ի հետ զրույցում Թալինի քաղաքապետ Սարգիս Արամյանը պատմեց, որ Գոռը սովորում է Երեւանի պետական համալսարանի պատմության ֆակուլտետի առաջին կուրսում, ունի իրենից ավագ մեկ քույր, որը նույնպես սովորում է ԵՊՀ-ում:
«Գոռի պես երիտասարդներ շատ քիչ կան հիմա: Աշխատասեր, շատ լավ սովորող, հայրենասեր երեխա է, բարձր միավորներով է համալսարան ընդունվել, սովորելու հետ համատեղ նաեւ աշխատում էր»,-ասաց Թալինի քաղաքապետը՝ նշելով, որ Գոռի հայրն ու հորեղբայրը այժմ նրա մոտ են՝ հոսպիտալում:
Թալինի քաղաքապետի խոսքով՝ Գոռի ծնողները սովորական ապրող մարդիկ են, չեն աշխատում, զբաղվում են գյուղատնտեսությամբ:
Նշենք, որ Գոռ Դարմանյանի մոտ առկա է ոտքի ամպուտացիա, նրա վիճակի մեջ դրական տեղաշարժ կա:
Հիշեցնենք, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում: Հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են: Վիրավորված զինծառայողներից Սամվել Հակոբյանը մարտի 26-ին հոսպիտալում մահացել է: