ՀՀ քաղաքացիական ծառայության խորհուրդն ու Համաշխարհային բանկի ներկայացուցիչներն այսօր՝ մարտի 30-ին, ամփոփել են քաղաքացիական ծառայողների մոտիվացիան եւ աշխատանքի արտադրողականության մակարդակը բարձրացնելու նոր մեխանիզմների մշակման ուղղությամբ արված աշխատանքները:
Ինչպես տեղեկանում ենք ծառայության մամուլի բաժնից, քննարկմանը ներկայացվել է ՀՀ Կառավարության հետ մշակվելիք քաղաքացիական ծառայողների կատարողականի գնահատման համակարգի մասին այն հիմնական սկզբունքները կամ գաղափարները, որոնք, ՀՀ Քաղաքացիական ծառայության խորհրդի կարծիքով, կապահովեն ըստ արժանիքների՝ քաղծառայողների պարգեւատումների համակարգի, կարիերային աճի կառուցակարգերի ներդաշնակ գործարկումը: ՀՀ ՔԾԽ նախագահ Մանվել Բադալյանը շեշտել է, որ հեռանկարային նպատակը զուտ աշխատանքի կատարողականի գնահատումից դեպի քաղաքացիական ծառայողների արդյունավետության, որակական ու մասնագիտական հատկանիշների համալիր գնահատմանն անցնելն է:
Համաշխարհային բանկի պատվիրակության ղեկավար Դոնատո դե Ռոսան առանցքային է համարել քաղաքացիական ծառայողների ֆինանսական խրախուսման համար կատարողականի գնահատման համակարգի կատարելագործումը իրավական կարգավորումների ենթարկելու եւ այս հարցում ՀՀ Կառավարության հետ համագործակցելու անհրաժեշտությունը՝ հաշվի առնելով, որ բարեփոխումն իրականացնելը տեւական ժամանակ է պահանջում:
Գործընթացի հաջողությունն ապահովելու եւ սահուն իրականացնելու առումով երկուստեք կարեւորվել է պիլոտային ծրագրերով առաջնոդրվելու խնդիրը:
