Եվրասիական տնտեսական միության շրջանակներում արժութային միություն ստեղծելը օրակարգի հարց չէ։ Այդ թեման դեռ փորձագետների ուսումնասիրությունների շրջանակում է արծարծվում։ Այս մասին «Ռոսիա-24» հեռուստաընկերության եթերում հայտարարել է ՌԴ առաջին փոխվարչապետ Իգոր Շուվալովը։
«ՌԴ նախագահը հանձնարարել է մշակել հնարավոր արժութային միություն ստեղծելու հարցը։ Սակայն դա չի նշանակում, որ այդ միությունն անմիջապես ստեղծվելու է։ Անհրաժեշտ է հաշվի առնել այլ արժութային միությունների փորձը, առաջին հերթին ԵՄ փորձը, ընդ որում չմոռանալով նաեւ բացասական կողմերի մաիսն։ Պետք է հասկանանք, ԵՏՄ անդամ երկրները պատրա՞ստ են մտնել արժութային միություն այն ժամանակ, երբ չենք հասել սղաճի թիրախային ցուցանիշներին, ազգային արժույթի կայունացմանը, թե՞ պետք է սահմանափակվենք ազգային բանկերի հետ համագործակցությամբ»,- ասել է Շուվալովը՝ նշելով, որ ԵՏՄ-ն բարդ ժամանակներ է ապրում 2 նոր պետությունների (Հայաստան եւ Ղրղզստան) անդամակցության պատճառով։
«Պետք է այնպես անել, որ չձախողենք եւ փորձենք հասնել կազմակերպման լավագույն մակարդակի»,- եզրափակել է Շուվալովը։
