ԱԱԾ պետի նախկին տեղակալ Գուրգեն Եղիազարյանը, այսօր` մարտի 30-ին, կոչ արեց մասնակցել 2011թ-ի դեկտեմբերի 27-ին՝ Մարտակերտի շրջանի պաշտպանական դիրքում զինվորական պարտականությունները կատարելիս հրազենային վնասվածք ստացած Գևորգ Եղիազարյանի բուժման համար կազմակերպված դրամահավաքին:
«Եղիազարյան ազգանունով մեր զինվորը գնացել է հայրենիքի սահմանը պաշտպանելու և ծանր վիրավորվել է: Պետությունը 54 հազար դոլար չունի, որպեսզի տա և այդ տղային Գերմանիայում տանեն բուժելու: Ամեն օր մորֆիի կարգի մի բան են ներարկում նրան, որպեսզի ցավազրկեն: Կոչ եմ անում բոլորին մասնակցել կազմակերպված դրամահավաքին, թե չէ սրանք ոչ մի բանով էլ չեն օգնի տղային: Նամուս չունե՞ք, ժողովուրդն է փող հավաքում, որ մեր բանակայինին օգնի, սա վիճակ չի »,-նշեց Եղիազարյանը:
Գուրգեն Եղիազարյանը նշեց, որ այս ամենը տեսնելով, երիտասարդները չեն ցանկանա գնալ բանակում ծառայելու:
«Լա՞վ եք պատկերացնում այն պատանուն, որը պետք է գնա վաղը բանակ ու տեսնում է կոկորդը ծակ Եղիազարյանի լուսանկարը, որն անօգնական պառկած է ու պետությունը չունի 54 հազար դոլար, որպեսզի բուժի նրան: Այն էլ այն պետությունը, որը գիշեր-ցերեկ զբաղված է թալանով: Սա է մեր իշխանությունը, սրանք խոպանում են գտնվում»,-ասաց Եղիազարյանը:
Ավելի վաղ NEWS.am-ը հաղորդել էր, որ զինվորական պարտականությունները կատարելիս՝ հակառակորդի կողմից հրազենային վնասվածք ստացած ժամկետային զինծառայող Գեւորգ Եղիազարյանն արդեն ավելի քան 3 տարի միայնակ տեղաշարժվել չի կարողանում. հակառակորդի գնդակը վնասել է Գեւորգի ողերն ու ողնուղեղը: Գեւորգ Եղիազարյանին օգնելու համար Յունիբանկ-ում բացվել է հաշվեհամար հոր՝ Էդիկ Եղիազարյանի անունով:
AMD 24100321447500
USD 24100321447501
EUR 24100321447502