«Պետական նշանակության ավտոճանապարհների հիմնանորոգում» ծրագրի շրջանակներում Տավուշի մարզի Դիլիջան քաղաքի տարածքում գտնվող օղակաձեւ հրապարակը բարեկարգվել եւ առավել հարմարավետ է դարձվել քաղաքի բնակիչների եւ այդ տարածքով երթեւեկողների համար:
Տրանսպորտի նախարարությունից հայտնում են, որ Դիլիջանի օղակաձեւ հրապարակը, որի հիմնանորոգված մակերեսը 8004 քմ է, Վանաձոր – Դիլիջան եւ Երեւան – Սեւան – Իջեւան միջպետական ավտոճանապարհների հատման կետն է: Այն ապահովում է տվյալ հատվածների անվտանգ երթեւեկությունը:
Հրապարակի որոշ հատվածներում մինչ այդ բազալտե եզրաքարերը քանդված էին, ասֆալտբետոնե ծածկը քայքայված էր: Երթեւեկելի մասի վրա առաջացած ճաքերն ու փոսերը բազմաթիվ դժվարություններ էին ստեղծում բոլոր տեսակի տրանսպորտային միջոցների համար:
ՀՀ տրանսպորտի եւ կապի նախարարության «Տրանսպորտի ԾԻԳ» պետական հիմնարկի պատվերով «Խաչհար» ՍՊ ընկերության ճանապարհաշինարարները կատարել են քանդված եզրաքարերի վերականգնման եւ ասֆալտբետոնե նոր ծածկի կառուցման աշխատանքներ:
Աշխատանքները կատարվել են ՀՀ պետական բյուջեի ֆինանսավորմամբ: Կապալի պայմանագրային արժեքը`57.871. 944 ՀՀ դրամ է:
ՀՀ տրանսպորտի եւ կապի նախարարի հրամանով ձեւավորված շինարարական աշխատանքներն ընդունող հանձնաժողովը ճանապարհահատվածն ընդունել է շահագործման:
