Ռուսաստանի Պետդումայի մշակույթի հարցերի հանձնաժողովի նախագահ, ռեժիսոր Ստանիսլավ Գովորուխինն այս տարվա աշնանը «Հրաշալի ժամանակաշրջանի ավարտը» վերնագրով ֆիլմ է թողարկելու, որը նկարահանվել է Սերգեյ Դովլաթովի ստեղծագործությունների հիման վրա: Այս մասին գրում է ՏԱՍՍ գործակալությունը:
«Ֆիլմը կինովարձույթում կհայտնվի աշնանը: Աշխատանքներն արդեն ավարտել եմ»,- լրագրողներին ասել է Գովորուխինը՝ նշելով, որ նկարահանումներն արդեն ավարտված են:
Ռեժիսորի խոսքով, գործող անձանցից մեկը լրագրող է, որը շատ բանով նման է հենց Դովլաթովին: «Սյուժեի կենտրոնում Անդրեյ Լենտուլովի պատմությունն է, որին ուղղակի դատողությունների համար ստիպում են Լենինգրադից տեղափոխվել Տալլին: Այնտեղ նա աշխատանքի է տեղավորվում տեղական թերթերից մեկում»,- պատմել է ռուսաստանցի ռեժիսորը:
Ժապավենի՝ «Հրաշալի ժամանակաշրջանի ավարտը» վերնագիրը վերցվել է Դովլաթովի համանուն հոդվածից: Գլխավոր դերերում հանդես են գալու, մասնավորապես, Իվան Կոլեսնիկովը, Սերգեյ Գարմաշը, Ֆյոդոր Դոբրոնրավովը, Դմիտրի Աստրախանը:
Հիշեցնենք, որ Ստանիսլավ Գովորուխինը ֆիլմի նկարահանումները սկսել էր 2014 թվականի ամռանը: Ժապավենի հիմքում Սերգեյ Դովլաթովի «Փոխզիջում» նովելների հավաքածուն է: